[494] Tena kho pana samayena aññatarā itthī sāmikena saha bhaṇḍitvā mātugharaṃ agamāsi . kulūpako bhikkhu sammodanīyaṃ akāsi . Tassa kukkuccaṃ ahosi .pe. alaṃvacanīyā bhikkhūti . nālaṃvacanīyā bhagavāti. Anāpatti bhikkhu nālaṃvacanīyeti.

[495] Tena kho pana samayena aññataro bhikkhu paṇḍake sañcarittaṃ samāpajji . tassa kukkuccaṃ ahosi .pe. anāpatti bhikkhu saṅghādisesassa āpatti thullaccayassāti. Pañcamasaṅghādisesaṃ niṭṭhitaṃ. ---------- Chaṭṭhasaṅghādisesaṃ

[496] Tena samayena buddho bhagavā rājagahe viharati veḷuvane kalandakanivāpe . tena kho pana samayena āḷavikā bhikkhū saññācikāyo kuṭikāyo kārāpenti assāmikāyo attuddesikāyo appamāṇikāyo . tāyo na niṭṭhānaṃ gacchanti . te yācanabahulā viññattibahulā viharanti purisaṃ detha purisatthakaraṃ detha goṇaṃ detha sakaṭaṃ detha vāsiṃ detha pharasuṃ detha kuṭhāriṃ detha kuddālaṃ detha nikhādanaṃ detha valliṃ detha veḷuṃ detha muñjaṃ detha pabbajaṃ detha tiṇaṃ detha mattikaṃ dethāti . manussā upaddutā yācanāya upaddutā viññattiyā bhikkhū disvā ubbijjantipi uttasantipi palāyantipi aññenapi gacchanti aññenapi mukhaṃ karonti dvāraṃpi thakenti gāvīpi disvā palāyanti bhikkhūti maññamānā.

[497] Athakho āyasmā mahākassapo rājagahe vassaṃ vuttho yena āḷavī tena pakkāmi anupubbena cārikaṃ caramāno yena āḷavī tadavasari . tatra sudaṃ āyasmā mahākassapo āḷaviyaṃ viharati aggāḷave cetiye . athakho āyasmā mahākassapo pubbaṇhasamayaṃ nivāsetvā pattacīvaramādāya āḷaviṃ piṇḍāya pāvisi . Manussā āyasmantaṃ mahākassapaṃ passitvā ubbijjantipi uttasantipi palāyantipi aññenapi gacchanti aññenapi mukhaṃ karonti dvāraṃpi thakenti . athakho āyasmā mahākassapo āḷaviyaṃ piṇḍāya caritvā pacchābhattaṃ piṇḍapātapaṭikkanto bhikkhū āmantesi pubbāyaṃ āvuso āḷavī subhikkhā ahosi sulabhapiṇḍā sukarā uñchena paggahena yāpetuṃ etarahi kho panāyaṃ āḷavī dubbhikkhā dullabhapiṇḍā na sukarā uñchena paggahena yāpetuṃ ko nu kho āvuso hetu ko paccayo yenāyaṃ āḷavī dubbhikkhā dullabhapiṇḍā na sukarā uñchena paggahena yāpetunti . athakho te bhikkhū āyasmato mahākassapassa etamatthaṃ ārocesuṃ.