[538] Attanā vippakataṃ attanā pariyosāpeti āpatti Saṅghādisesassa . attanā vippakataṃ parehi pariyosāpeti āpatti saṅghādisesassa . parehi vippakataṃ attanā pariyosāpeti āpatti saṅghādisesassa . parehi vippakataṃ parehi pariyosāpeti āpatti saṅghādisesassa.

[539] Anāpatti leṇe guhāya tiṇakuṭikāya aññassatthāya vāsāgāraṃ ṭhapetvā sabbattha anāpatti ummattakassa ādikammikassāti. Sattamasaṅghādisesaṃ niṭṭhitaṃ. ----------------- Aṭṭhamasaṅghādisesaṃ

[540] Tena samayena buddho bhagavā rājagahe viharati veḷuvane kalandakanivāpe . tena kho pana samayena āyasmatā dabbena mallaputtena jātiyā sattavassena arahattaṃ sacchikataṃ hoti yaṅkiñci sāvakena pattabbaṃ sabbaṃ tena anuppattaṃ hoti natthi cassa kiñci uttariṃ karaṇīyaṃ katassa vā paṭicayo.

[541] Athakho āyasmato dabbassa mallaputtassa rahogatassa paṭisallīnassa evaṃ cetaso parivitakko udapādi mayā kho jātiyā sattavassena arahattaṃ sacchikataṃ yaṅkiñci sāvakena pattabbaṃ sabbaṃ mayā anuppattaṃ natthi ca me kiñci uttariṃ karaṇīyaṃ katassa vā paṭicayo kinnu kho ahaṃ saṅghassa veyyāvaccaṃ kareyyanti . athakho āyasmato dabbassa mallaputtassa etadahosi yannūnāhaṃ saṅghassa senāsanañca paññāpeyyaṃ bhattāni ca uddiseyyanti . athakho āyasmā dabbo mallaputto sāyaṇhasamayaṃ paṭisallānā vuṭṭhito yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho āyasmā dabbo mallaputto bhagavantaṃ etadavoca idha mayhaṃ bhante rahogatassa paṭisallīnassa evaṃ cetaso parivitakko udapādi mayā kho jātiyā sattavassena arahattaṃ sacchikataṃ yaṅkiñci sāvakena pattabbaṃ sabbaṃ mayā anuppattaṃ Natthi ca me kiñci uttariṃ karaṇīyaṃ katassa vā paṭicayo kinnu kho ahaṃ saṅghassa veyyāvaccaṃ kareyyanti tassa mayhaṃ bhante etadahosi yannūnāhaṃ saṅghassa senāsanañca paññāpeyyaṃ bhattāni ca uddiseyyanti icchāmahaṃ bhante saṅghassa senāsanañca paññāpetuṃ bhattāni ca uddisitunti . sādhu sādhu dabba tenahi tvaṃ saṅghassa senāsanañca paññāpehi bhattāni ca uddisāhīti . evaṃ bhanteti kho āyasmā dabbo mallaputto bhagavato paccassosi.