[14] Athakho sudinnassa kalandaputtassa sahāyakā yena sudinno kalandaputto tenupasaṅkamiṃsu upasaṅkamitvā sudinnaṃ kalandaputtaṃ etadavocuṃ uṭṭhehi samma sudinna anuññātosi mātāpitūhi agārasmā anagāriyaṃ pabbajjāyāti . athakho sudinno kalandaputto anuññātomhi kira mātāpitūhi agārasmā anagāriyaṃ pabbajjāyāti haṭṭho udaggo pāṇinā gattāni paripuñchanto vuṭṭhāsi . Athakho sudinno kalandaputto katipāhaṃ balaṃ gāhetvā yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho sudinno kalandaputto bhagavantaṃ etadavoca anuññātomhi ahaṃ bhante mātāpitūhi agārasmā anagāriyaṃ pabbajjāya pabbājetu maṃ bhante bhagavāti . alattha kho sudinno kalandaputto bhagavato santike pabbajjaṃ alattha upasampadaṃ . Acirupasampanno ca panāyasmā sudinno evarūpe dhūtaguṇe samādāya vattati āraññiko hoti piṇḍapātiko paṃsukūliko sapadānacāriko aññataraṃ vajjīgāmaṃ upanissāya viharati.

[15] Tena kho pana samayena vajjī dubbhikkhā hoti dvīhitikā setaṭṭhikā salākāvuttā na sukarā uñchena paggahena yāpetuṃ . Athakho āyasmato sudinnassa etadahosi etarahi kho vajjī Dubbhikkhā dvīhitikā setaṭṭhikā salākāvuttā na sukarā uñchena paggahena yāpetuṃ bahū kho pana me vesāliyaṃ ñātakā aḍḍhā mahaddhanā mahābhogā pahūtajātarūparajatā pahūtavittūpakaraṇā pahūtadhanadhaññā yannūnāhaṃ ñātakānaṃ upanissāya vihareyyaṃ ñātakāpi maṃ nissāya dānāni dassanti puññāni karissanti bhikkhū ca lābhaṃ lacchanti ahañca piṇḍakena na kilamissāmīti . athakho āyasmā sudinno senāsanaṃ saṃsāmetvā pattacīvaramādāya yena vesālī tena pakkāmi anupubbena cārikaṃ caramāno yena vesālī tadavasari. {15.1} Tatra sudaṃ āyasmā sudinno vesāliyaṃ viharati mahāvane kūṭāgārasālāyaṃ . assosuṃ kho āyasmato sudinnassa ñātakā sudinno kira kalandaputto vesāliṃ anuppattoti . te āyasmato sudinnassa saṭṭhimatte thālipāke bhattābhihāraṃ abhihariṃsu . athakho āyasmā sudinno te saṭṭhimatte thālipāke bhikkhūnaṃ vissajjetvā pubbaṇhasamayaṃ nivāsetvā pattacīvaramādāya kalandagāmaṃ piṇḍāya pāvisi kalandagāme sapadānaṃ piṇḍāya caramāno yena sakapitu nivesanaṃ tenupasaṅkami . tena kho pana samayena āyasmato sudinnassa ñātidāsī ābhidosikaṃ kummāsaṃ chaḍḍetukāmā hoti . Athakho āyasmā sudinno taṃ ñātidāsiṃ etadavoca sace taṃ bhagini Chaḍḍanīyadhammaṃ idha me patte ākirāti . athakho āyasmato sudinnassa ñātidāsī taṃ ābhidosikaṃ kummāsaṃ āyasmato sudinnassa patte ākirantī hatthānañca pādānañca sarassa ca nimittaṃ aggahesi . athakho āyasmato sudinnassa ñātidāsī yenāyasmato sudinnassa mātā tenupasaṅkami upasaṅkamitvā āyasmato sudinnassa mātaraṃ etadavoca yagghayye jāneyyāsi ayyaputto sudinno anuppattoti. Sace je saccaṃ bhaṇasi adāsiṃ taṃ karomīti. {15.2} Tena kho pana samayena āyasmā sudinno taṃ ābhidosikaṃ kummāsaṃ aññataraṃ kuḍḍamūlaṃ nissāya paribhuñjati . pitāpi kho āyasmato sudinnassa kammantā āgacchanto addasa āyasmantaṃ sudinnaṃ taṃ ābhidosikaṃ kummāsaṃ aññataraṃ kuḍḍamūlaṃ nissāya paribhuñjantaṃ disvāna yenāyasmā sudinno tenupasaṅkami upasaṅkamitvā āyasmantaṃ sudinnaṃ etadavoca atthi nāma tāta sudinna ābhidosikaṃ kummāsaṃ paribhuñjissasi nanu tāta sudinna sakagehaṃ gantabbanti. Agamamhā kho te gahapati gehaṃ tatāyaṃ ābhidosiko kummāso mayā laddhoti . Athakho āyasmato sudinnassa pitā āyasmato sudinnassa bāhāyaṃ gahetvā āyasmantaṃ sudinnaṃ etadavoca ehi tāta sudinna gharaṃ gamissāmāti . athakho āyasmā sudinno yena sakapitu nivesanaṃ Tenupasaṅkami upasaṅkamitvā paññatte āsane nisīdi . athakho āyasmato sudinnassa pitā āyasmantaṃ sudinnaṃ etadavoca bhuñja tāta sudinnāti . alaṃ gahapati kataṃ me ajja bhattakiccanti . Adhivāsehi tāta sudinna svātanāya bhattanti . adhivāsesi kho āyasmā sudinno tuṇhībhāvena . athakho āyasmā sudinno uṭṭhāyāsanā pakkāmi.