[16] Athakho āyasmato sudinnassa mātā tassā rattiyā accayena haritena gomayena paṭhaviṃ opuñchāpetvā dve puñje kārāpesi ekaṃ hiraññassa ekaṃ suvaṇṇassa tāva mahantā puñjā ahesuṃ orato ṭhito puriso pārato ṭhitaṃ purisaṃ na passati pārato ṭhito puriso orato ṭhitaṃ purisaṃ na passati te puñje kilañjehi paṭicchādāpetvā majjhe āsanaṃ paññāpetvā tirokaraṇīyaṃ parikkhipāpetvā āyasmato sudinnassa purāṇadutiyikaṃ āmantesi tenahi vadhu yena alaṅkārena alaṅkatā puttassa sudinnassa piyā ahosi manāpā tena alaṅkārena alaṅkarāti . evaṃ ayyeti kho āyasmato sudinnassa purāṇadutiyikā āyasmato sudinnassa mātuyā paccassosi. {16.1} Athakho āyasmā sudinno pubbaṇhasamayaṃ nivāsetvā pattacīvaramādāya yena sakapitu nivesanaṃ tenupasaṅkami upasaṅkamitvā paññatte āsane nisīdi . athakho āyasmato Sudinnassa pitā yenāyasmā sudinno tenupasaṅkami upasaṅkamitvā te puñje vivarāpetvā āyasmantaṃ sudinnaṃ etadavoca idante tāta sudinna mātumattikaṃ itthikāya itthīdhanaṃ aññaṃ pettikaṃ aññaṃ pitāmahaṃ labbhā tāta sudinna hīnāyāvattitvā bhogā ca bhuñjituṃ puññāni ca kātuṃ ehi tvaṃ tāta sudinna hīnāyāvattitvā bhoge ca bhuñjassu puññāni ca karohīti . tāta na ussahāmi na visahāmi abhirato ahaṃ brahmacariyaṃ carāmīti . dutiyampi kho .pe. tatiyampi kho āyasmato sudinnassa pitā āyasmantaṃ sudinnaṃ etadavoca idante tāta sudinna mātumattikaṃ itthikāya itthīdhanaṃ aññaṃ pettikaṃ aññaṃ pitāmahaṃ labbhā tāta sudinna hīnāyāvattitvā bhogā ca bhuñjituṃ puññāni ca kātuṃ ehi tvaṃ tāta sudinna hīnāyāvattitvā bhoge ca bhuñjassu puññāni ca karohīti . vadeyyāma kho taṃ gahapati sace tvaṃ nātikaḍḍheyyāsīti . vadehi tāta sudinnāti . tenahi tvaṃ gahapati mahante mahante sāṇipasibbake kārāpetvā hiraññasuvaṇṇassa pūrāpetvā sakaṭehi nibbāhāpetvā majjhe gaṅgāya sote osādehi taṃ kissa hetu yaṃ hi te gahapati bhavissati tatonidānaṃ bhayaṃ vā chambhitattaṃ vā lomahaṃso vā ārakkho vā so te na bhavissatīti . evaṃ vutte āyasmato sudinnassa pitā Anattamano ahosi kathaṃ hi nāma putto sudinno evaṃ vakkhatīti. {16.2} Athakho āyasmato sudinnassa pitā āyasmato sudinnassa purāṇadutiyikaṃ āmantesi tenahi vadhu tvaṃ piyā ca manāpā ca appevanāma putto sudinno tuyhaṃpi vacanaṃ kareyyāti . athakho āyasmato sudinnassa purāṇadutiyikā āyasmato sudinnassa pādesu gahetvā āyasmantaṃ sudinnaṃ etadavoca kīdisā nāma tā ayyaputta accharāyo yāsaṃ tvaṃ hetu brahmacariyaṃ carasīti . na kho ahaṃ bhagini accharānaṃ hetu brahmacariyaṃ carāmīti . athakho āyasmato sudinnassa purāṇadutiyikā ajjatagge maṃ ayyaputto sudinno bhaginivādena samudācaratīti tattheva mucchitā papatā. {16.3} Athakho āyasmā sudinno pitaraṃ etadavoca sace gahapati bhojanaṃ dātabbaṃ detha mā no viheṭhayitthāti . Bhuñja tāta sudinnāti. Athakho āyasmato sudinnassa mātā ca pitā ca āyasmantaṃ sudinnaṃ paṇītena khādanīyena bhojanīyena sahatthā santappesuṃ sampavāresuṃ . Athakho āyasmato sudinnassa mātā āyasmantaṃ sudinnaṃ bhuttāviṃ onītapattapāṇiṃ etadavoca idaṃ tāta sudinna kulaṃ aḍḍhaṃ mahaddhanaṃ mahābhogaṃ pahūtajātarūparajataṃ pahūtavittūpakaraṇaṃ pahūtadhanadhaññaṃ labbhā tāta sudinna hīnāyāvattitvā bhogā ca bhuñjituṃ puññāni ca kātuṃ ehi tvaṃ tāta sudinna hīnāyāvattitvā bhoge ca bhuñjassu puññāni ca karohīti . amma na ussahāmi na visahāmi Abhirato ahaṃ brahmacariyaṃ carāmīti . dutiyampi kho .pe. tatiyampi kho āyasmato sudinnassa mātā āyasmantaṃ sudinnaṃ etadavoca idaṃ tāta sudinna kulaṃ aḍḍhaṃ mahaddhanaṃ mahābhogaṃ pahūtajātarūparajataṃ pahūtavittūpakaraṇaṃ pahūtadhanadhaññaṃ tenahi tāta sudinna bījakaṃpi dehi mā no aputtakaṃ sāpateyyaṃ licchavino atiharāpesunti . Etaṃ kho me amma sakkā kātunti . kahaṃ pana tāta sudinna etarahi viharasīti . mahāvane ammāti . athakho āyasmā sudinno uṭṭhāyāsanā pakkāmi.