[281] Anāpatti adhimānena anullapanādhippāyassa ummattakassa khittacittassa vedanaṭṭassa ādikammikassāti.

[282] Adhimāne araññamhi piṇḍopajjhāriyāpatho saññojanā raho dhammā vihāro paccupaṭṭhito na dukkaraṃ viriyamathopi maccuno bhāyāvuso vippaṭisāri sammā viriyena yogena arādhanāya atha vedanāya adhivāsanā duve brāhmaṇe pañca vatthūni aññaṃ byākaraṇā tayo agārāvaraṇā kāmā rati cāpi apakkami aṭṭhi pesī ubho gāvaghātakā piṇḍo sākuṇiko nicchavorabbhi asi ca sūkariko satti māgavi usu ca kāraṇiko sūci sārathi yo ca sibbiyati sūcako hi so aṇḍabhāri ahū gāmakūṭako kūpe nimuggo hi so pāradāriko gūthakhādī ahū duṭṭhabrāhmaṇo nicchavitthī aticārinī ahū maṅgulitthī ahū ikkhaṇitthikā Okilinī sapattiṅgārokiri sīsacchinno ahū coraghātako bhikkhu bhikkhunī sikkhamānā sāmaṇero atha sāmaṇerikā kassapassa vinayasmiṃ pabbajjā pāpakammaṃ te akariṃsu tāvade tapodā rājagahe yuddhaṃ nāgānogāhanena ca sobhito arahaṃ bhikkhu pañcakappasataṃ sareti.

[283] Tena kho pana samayena aññataro bhikkhu adhimānena aññaṃ byākāsi . tassa kukkuccaṃ ahosi bhagavatā sikkhāpadaṃ paññattaṃ kacci nu kho ahaṃ pārājikaṃ āpattiṃ āpannoti . athakho so bhikkhu bhagavato etamatthaṃ ārocesi. Anāpatti bhikkhu adhimānenāti.

[284] Tena kho pana samayena aññataro bhikkhu paṇidhāya araññe viharati evaṃ maṃ jano sambhāvessatīti . taṃ jano sambhāvesi. Tassa kukkuccaṃ ahosi .pe. anāpatti bhikkhu pārājikassa na ca bhikkhave paṇidhāya araññe vatthabbaṃ yo vaseyya āpatti dukkaṭassāti. {284.1} Tena kho pana samayena aññataro bhikkhu paṇidhāya piṇḍāya carati evaṃ maṃ jano sambhāvessatīti. Taṃ jano sambhāvesi. Tassa kukkuccaṃ ahosi .pe. anāpatti bhikkhu pārājikassa na ca bhikkhave paṇidhāya piṇḍāya caritabbaṃ yo careyya āpatti dukkaṭassāti.