[285] Tena kho pana samayena aññataro bhikkhu aññataraṃ bhikkhuṃ etadavoca ye āvuso amhākaṃ upajjhāyassa saddhivihārikā sabbe va arahantoti . tassa kukkuccaṃ ahosi . bhagavato etamatthaṃ ārocesi . kiṃcitto tvaṃ bhikkhūti . ullapanādhippāyo ahaṃ bhagavāti. Anāpatti bhikkhu pārājikassa āpatti thullaccayassāti. {285.1} Tena kho pana samayena aññataro bhikkhu aññataraṃ bhikkhuṃ etadavoca ye āvuso amhākaṃ upajjhāyassa antevāsikā sabbe va mahiddhikā mahānubhāvāti . tassa kukkuccaṃ ahosi . Bhagavato etamatthaṃ ārocesi . kiṃcitto tvaṃ bhikkhūti . Ullapanādhippāyo ahaṃ bhagavāti . anāpatti bhikkhu pārājikassa āpatti thullaccayassāti.

[286] Tena kho pana samayena aññataro bhikkhu paṇidhāya caṅkamati evaṃ maṃ jano sambhāvessatīti . taṃ jano sambhāvesi. Tassa kukkuccaṃ ahosi . bhagavato etamatthaṃ ārocesi . anāpatti bhikkhu pārājikassa na ca bhikkhave paṇidhāya caṅkamitabbaṃ yo caṅkameyya āpatti dukkaṭassāti. {286.1} Tena kho pana samayena aññataro bhikkhu paṇidhāya tiṭṭhati .pe. paṇidhāya nisīdati .pe. paṇidhāya seyyaṃ kappeti evaṃ maṃ jano sambhāvessatīti . taṃ jano sambhāvesi. Tassa kukkuccaṃ ahosi . bhagavato etamatthaṃ ārocesi . anāpatti bhikkhu pārājikassa na ca bhikkhave paṇidhāya seyyā kappetabbā yo kappeyya āpatti dukkaṭassāti.

[287] Tena kho pana samayena aññataro bhikkhu aññatarassa bhikkhuno uttarimanussadhammaṃ ullapati . sopi evamāha mayhaṃpi āvuso saññojanā pahīnāti . tassa kukkuccaṃ ahosi . Bhagavato etamatthaṃ ārocesi . āpattiṃ tvaṃ bhikkhu āpanno pārājikanti.

[288] Tena kho pana samayena aññataro bhikkhu rahogato uttarimanussadhammaṃ ullapati . paracittavidū bhikkhu taṃ bhikkhuṃ apasādesi mā āvuso evarūpaṃ abhaṇi nattheso tuyhanti . tassa kukkuccaṃ ahosi . bhagavato etamatthaṃ ārocesi . anāpatti bhikkhu pārājikassa āpatti dukkaṭassāti. {288.1} Tena kho pana samayena aññataro bhikkhu rahogato uttari- manussadhammaṃ ullapati . devatā taṃ bhikkhuṃ apasādesi mā bhante evarūpaṃ abhaṇi nattheso tuyhanti . tassa kukkuccaṃ ahosi . Bhagavato etamatthaṃ ārocesi. Anāpatti bhikkhu pārājikassa āpatti dukkaṭassāti.