[289] Tena kho pana samayena aññataro bhikkhu aññataraṃ upāsakaṃ etadavoca yo āvuso tuyhaṃ vihāre vasati so bhikkhu Arahāti . so ca bhikkhu tassa vihāre vasati . tassa kukkuccaṃ ahosi . bhagavato etamatthaṃ ārocesi . kiṃcitto tvaṃ bhikkhūti . Ullapanādhippāyo ahaṃ bhagavāti . anāpatti bhikkhu pārājikassa āpatti thullaccayassāti. {289.1} Tena kho pana samayena aññataro bhikkhu aññataraṃ upāsakaṃ etadavoca yaṃ tvaṃ āvuso bhikkhuṃ upaṭṭhāsi cīvarapiṇḍapātasenāsana- gilānapaccayabhesajjaparikkhārena so bhikkhu arahāti . so ca taṃ bhikkhuṃ upaṭṭhāti cīvarapiṇḍapātasenāsanagilānapaccayabhesajjaparikkhārena . Tassa kukkuccaṃ ahosi . bhagavato etamatthaṃ ārocesi . Kiṃcitto tvaṃ bhikkhūti . ullapanādhippāyo ahaṃ bhagavāti . Anāpatti bhikkhu pārājikassa āpatti thullaccayassāti.

[290] Tena kho pana samayena aññataro bhikkhu gilāno hoti . taṃ bhikkhū etadavocuṃ atthāyasmato uttarimanussadhammoti . Nāvuso dukkaraṃ aññaṃ byākātunti . tassa kukkuccaṃ ahosi ye kho te bhagavato sāvakā te evaṃ vadeyyuṃ ahañcamhi na bhagavato sāvako kacci nu kho ahaṃ pārājikaṃ āpattiṃ āpannoti . bhagavato etamatthaṃ ārocesi . kiṃcitto tvaṃ bhikkhūti . anullapanādhippāyo ahaṃ bhagavāti . anāpatti bhikkhu Anullapanādhippāyassāti . {290.1} Tena kho pana samayena aññataro bhikkhu gilāno hoti . taṃ bhikkhū etadavocuṃ atthāyasmato uttarimanussadhammoti . Ārādhanīyo kho āvuso dhammo āraddhaviriyenāti . tassa kukkuccaṃ ahosi .pe. Anāpatti bhikkhu anullapanādhippāyassāti. {290.2} Tena kho pana samayena aññataro bhikkhu gilāno hoti. Taṃ bhikkhū etadavocuṃ mā kho āvuso bhāyīti . Nāhaṃ āvuso maccuno bhāyāmīti . tassa kukkuccaṃ ahosi .pe. anāpatti bhikkhu anullapanādhippāyassāti. {290.3} Tena kho pana samayena aññataro bhikkhu gilāno hoti. Taṃ bhikkhū etadavocuṃ mā kho āvuso bhāyīti. Yo nūnāvuso vippaṭisārī assa so bhāyeyyāti . tassa kukkuccaṃ ahosi .pe. anāpatti bhikkhu anullapanādhippāyassāti. {290.4} Tena kho pana samayena aññataro bhikkhu gilāno hoti . taṃ bhikkhū etadavocuṃ atthāyasmato uttarimanussadhammoti . Ārādhanīyo kho āvuso dhammo sammāpayuttenāti . tassa kukkuccaṃ ahosi .pe. Anāpatti bhikkhu anullapanādhippāyassāti. {290.5} Tena kho pana samayena aññataro Bhikkhu gilāno hoti . taṃ bhikkhū etadavocuṃ atthāyasmato uttarimanussadhammoti . ārādhanīyo kho āvuso dhammo āraddhaviriyenāti . tassa kukkuccaṃ ahosi .pe. anāpatti bhikkhu anullapanādhippāyassāti . tena kho pana samayena aññataro bhikkhu gilāno hoti . taṃ bhikkhū etadavocuṃ atthāyasmato uttarimanussadhammoti . ārādhanīyo kho āvuso dhammo yuttayogenāti. Tassa kukkuccaṃ ahosi .pe. Anāpatti bhikkhu anullapanādhippāyassāti. {290.6} Tena kho pana samayena aññataro bhikkhu gilāno hoti. Taṃ bhikkhū etadavocuṃ kaccāvuso khamanīyaṃ kacci yāpanīyanti . Nāvuso sakkā yena vā tena vā adhivāsetunti . tassa kukkuccaṃ ahosi .pe. Anāpatti bhikkhu anullapanādhippāyassāti. {290.7} Tena kho pana samayena aññataro bhikkhu gilāno hoti. Taṃ bhikkhū etadavocuṃ kaccāvuso khamanīyaṃ kacci yāpanīyanti. Nāvuso sakkā puthujjanena adhivāsetunti . tassa kukkuccaṃ ahosi .pe. bhagavato etamatthaṃ ārocesi . kiṃcitto tvaṃ bhikkhūti . ullapanādhippāyo ahaṃ bhagavāti. Anāpatti bhikkhu pārājikassa āpatti thullaccayassāti.