[291] Tena kho pana samayena aññataro brāhmaṇo bhikkhū nimantetvā etadavoca āyantu bhonto arahantoti . tesaṃ kukkuccaṃ ahosi mayañcamhā na arahanto ayañca brāhmaṇo Amhe arahantavādena samudācarati kathaṃ nu kho amhehi paṭipajjitabbanti. Bhagavato etamatthaṃ ārocesuṃ. Anāpatti bhikkhave pasādabhaññeti. {291.1} Tena kho pana samayena aññataro brāhmaṇo bhikkhū nimantetvā etadavoca nisīdantu bhonto arahantoti .pe. Bhuñjantu bhonto arahantoti .pe. tappentu bhonto arahantoti .pe. gacchantu bhonto arahantoti . tesaṃ kukkuccaṃ ahosi mayañcamhā na arahanto ayañca brāhmaṇo amhe arahantavādena samudācarati kathaṃ nu kho amhehi paṭipajjitabbanti . bhagavato etamatthaṃ ārocesuṃ. Anāpatti bhikkhave pasādabhaññeti.

[292] Tena kho pana samayena aññataro bhikkhu aññatarassa bhikkhuno uttarimanussadhammaṃ ullapati . sopi evamāha mayhaṃpi āvuso āsavā pahīnāti . tassa kukkuccaṃ ahosi .pe. Āpattiṃ tvaṃ bhikkhu āpanno pārājikanti. {292.1} Tena kho pana samayena aññataro bhikkhu aññatarassa bhikkhuno uttarimanussadhammaṃ ullapati . sopi evamāha mayhaṃpi āvuso ete dhammā saṃvijjantīti . tassa kukkuccaṃ ahosi. Bhagavato etamatthaṃ ārocesi. Āpattiṃ tvaṃ bhikkhu āpanno pārājikanti. {292.2} Tena kho pana samayena aññataro bhikkhu aññatarassa bhikkhuno uttarimanussadhammaṃ ullapati . sopi evamāha ahaṃpi āvuso etesu dhammesu sandissāmīti. Tassa kukkuccaṃ ahosi. Bhagavato etamatthaṃ ārocesi. Āpattiṃ Tvaṃ bhikkhu āpanno pārājikanti.

[293] Tena kho pana samayena aññataraṃ bhikkhuṃ ñātakā etadavocuṃ ehi bhante agāraṃ ajjhāvasāti . abhabbo kho āvuso mādiso agāraṃ ajjhāvasitunti . tassa kukkuccaṃ ahosi. Bhagavato etamatthaṃ ārocesi. Kiṃcitto tvaṃ bhikkhūti . anullapanādhippāyo ahaṃ bhagavāti . anāpatti bhikkhu anullapanādhippāyassāti. {293.1} Tena kho pana samayena aññataraṃ bhikkhuṃ ñātakā etadavocuṃ ehi bhante kāme paribhuñjāti . āvaṭā me āvuso kāmāti . Tassa kukkuccaṃ ahosi . bhagavato etamatthaṃ ārocesi . kiṃcitto tvaṃ bhikkhūti . anullapanādhippāyo ahaṃ bhagavāti . anāpatti bhikkhu anullapanādhippāyassāti. {293.2} Tena kho pana samayena aññataraṃ bhikkhuṃ ñātakā etadavocuṃ abhiramasi bhanteti . abhirato ahaṃ āvuso paramāya abhiratiyāti. Tassa kukkuccaṃ ahosi ye kho te bhagavato sāvakā te evaṃ vadeyyuṃ ahañcamhi na bhagavato sāvako kacci nu kho ahaṃ pārājikaṃ āpattiṃ āpannoti. Bhagavato etamatthaṃ ārocesi . Kiṃcitto tvaṃ bhikkhūti. Anullapanādhippāyo ahaṃ bhagavāti. Anāpatti bhikkhu anullapanādhippāyassāti.