[302] Tena kho pana samayena bhikkhū paṇītāni bhojanāni bhiñjitvā muṭṭhassatī asampajānā niddaṃ okkamanti . tesaṃ muṭṭhassatīnaṃ asampajānānaṃ niddaṃ okkamantānaṃ supinantena asuci muccati . Tesaṃ kukkuccaṃ ahosi bhagavatā sikkhāpadaṃ paññattaṃ sañcetanikā sukkavisaṭṭhi saṅghādisesoti amhākañca supinantena asuci muccati atthi cettha cetanā upalabbhati kacci nu kho mayaṃ saṅghādisesaṃ āpattiṃ āpannāti . bhagavato etamatthaṃ ārocesuṃ . atthesā bhikkhave cetanā sā ca kho abbohārikāti . athakho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi .pe. Evañca pana bhikkhave imaṃ sikkhāpadaṃ uddiseyyātha {302.1} sañcetanikā sukkavisaṭṭhi aññatra supinantā saṅghādisesoti.

[303] Sañcetanikāti jānanto sañjānanto cecca abhivitaritvā vītikkamo . sukkanti dasa sukkāni nīlaṃ pītakaṃ lohitakaṃ odātaṃ takkavaṇṇaṃ dakavaṇṇaṃ telavaṇṇaṃ khīravaṇṇaṃ dadhivaṇṇaṃ sappivaṇṇaṃ . Visaṭṭhīti ṭhānā cāvanā vuccati visaṭṭhīti . aññatra supinantāti ṭhapetvā supinantaṃ . saṅghādisesoti saṅgho va tassā āpattiyā parivāsaṃ deti mūlāya paṭikassati mānattaṃ deti abbheti na sambahulā na ekapuggalo tena vuccati saṅghādisesoti . Tasseva āpattinikāyassa nāmakammaṃ adhivacanaṃ tenapi vuccati saṅghādisesoti.

[304] Ajjhattarūpe moceti bahiddhārūpe moceti ajjhattabahiddhārūpe moceti ākāse kaṭiṃ kampento moceti rāgūpatthambhe moceti vaccūpatthambhe moceti passāvūpatthambhe moceti vātūpatthambhe moceti uccāliṅgapāṇakadaṭṭhūpatthambhe moceti ārogyatthāya moceti sukhatthāya moceti bhesajjatthāya moceti dānatthāya moceti puññatthāya moceti yaññatthāya moceti saggatthāya moceti vījatthāya moceti vīmaṃsatthāya moceti davatthāya moceti nīlaṃ moceti pītakaṃ moceti lohitakaṃ moceti odātaṃ moceti takkavaṇṇaṃ moceti dakavaṇṇaṃ moceti telavaṇṇaṃ moceti khīravaṇṇaṃ moceti dadhivaṇṇaṃ moceti sappivaṇṇaṃ moceti.