[378] Yo panāti yo yādiso .pe. bhikkhūti .pe. ayaṃ imasmiṃ atthe adhippeto bhikkhūti . otiṇṇo nāma sāratto apekkhavā paṭibaddhacitto . vipariṇatanti rattaṃpi cittaṃ vipariṇataṃ duṭṭhaṃpi cittaṃ vipariṇataṃ mūḷhaṃpi cittaṃ vipariṇataṃ apica rattaṃ cittaṃ imasmiṃ atthe adhippetaṃ vipariṇatanti . mātugāmo nāma manussitthī na yakkhī na petī na tiracchānagatā antamaso tadahujātāpi dārikā pageva mahantatarī . saddhinti ekato . Kāyasaṃsaggaṃ samāpajjeyyāti ajjhācāro vuccati . hattho nāma kappuraṃ upādāya yāva agganakhā . veṇi nāma suddhakesā vā suttamissā vā mālāmissā vā hiraññamissā vā suvaṇṇamissā vā muttāmissā vā maṇimissā vā . aṅgaṃ nāma hatthañca veṇiñca ṭhapetvā avasesaṃ aṅgaṃ nāma.

[379] Āmasanā parāmasanā omasanā ummasanā olaṅghanā ullaṅghanā ākaḍḍhanā paṭikaḍḍhanā abhiniggaṇhanā abhinippīḷanā gahaṇaṃ chupananti.

[380] Āmasanā nāma āmaṭṭhamattā . parāmasanā nāma ito cito ca sañcopanā . omasanā nāma heṭṭhā oropanā . Ummasanā nāma uddhaṃ uccāraṇā . olaṅghanā nāma heṭṭhā onamanā . ullaṅghanā nāma uddhaṃ uccāraṇā . ākaḍḍhanā nāma āviñjanā . paṭikaḍḍhanā nāma paṭipaṇāmanā . abhiniggaṇhanā nāma aṅgaṃ gahetvā nippīḷanā . abhinippīḷanā nāma kenaci saha nippīḷanā. Gahaṇaṃ nāma gahitamattaṃ. Chupanaṃ nāma phuṭṭhamattaṃ.

[381] Saṅghādisesoti saṅgho va tassā āpattiyā .pe. Tenapi vuccati saṅghādisesoti.