[423] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena āyasmā udāyi sāvatthiyaṃ kulūpako hoti bahukāni kulāni upasaṅkamati yattha passati kumārakaṃ vā apajāpatikaṃ kumārikaṃ vā apatikaṃ kumārakassa mātāpitūnaṃ santike kumārikāya vaṇṇaṃ bhaṇati amukassa kulassa kumārikā abhirūpā dassanīyā pāsādikā paṇḍitā byattā medhāvinī dakkhā analasā channā sā kumārikā imassa kumārakassāti. {423.1} Te evaṃ vadenti ete kho bhante amhe na jānanti ke vā ime kassa vāti sace bhante ayyo dāpeyya āneyyāma mayaṃ taṃ kumārikaṃ imassa kumārakassāti . kumārikāya mātāpitūnaṃ santike kumārakassa vaṇṇaṃ bhaṇati amukassa kulassa kumārako abhirūpo dassanīyo pāsādiko paṇḍito byatto medhāvī dakkho analaso channo so kumārako imissā kumārikāyāti . te evaṃ vadenti ete kho bhante amhe na jānanti ke vā ime kassa vāti kasmiṃ viya kumārikāya vatthuṃ sace bhante ayyo yācāpeyya dajjeyyāma mayaṃ imaṃ kumārikaṃ tassa kumārakassāti . eteneva upāyena āvāhānipi Kārāpeti vivāhānipi kārāpeti vāreyyānipi vattāpeti.
[424] Tena kho pana samayena aññatarissā purāṇagaṇakiyā dhītā abhirūpā hoti dassanīyā pāsādikā . tīrogāmakā ca ājīvakasāvakā āgantvā taṃ gaṇakiṃ etadavocuṃ dehayye imaṃ kumārikaṃ amhākaṃ kumārakassāti . sā evamāha ahaṃ khvayyā tumhe na jānāmi ke vā ime kassa vāti ayañca me ekadhītikā tīrogāmo ca gantabbo nāhaṃ dassāmīti . manussā te ājīvakasāvake etadavocuṃ kissa tumhe ayyā āgatatthāti . idha mayaṃ ayyā amukaṃ nāma gaṇakiṃ dhītaraṃ yācimhā amhākaṃ kumārakassa sā evamāha ahaṃ khvayyā tumhe na jānāmi ke vā ime kassa vāti ayañca me ekadhītikā tīrogāmo ca gantabbo nāhaṃ dassāmīti . kissa tumhe ayyā taṃ gaṇakiṃ dhītaraṃ yācittha nanu ayyo udāyi vattabbo ayyo udāyi dāpessatīti. {424.1} Athakho te ājīvakasāvakā yenāyasmā udāyi tenupasaṅkamiṃsu upasaṅkamitvā āyasmantaṃ udāyiṃ etadavocuṃ idha mayaṃ bhante amukaṃ nāma gaṇakiṃ dhītaraṃ yācimhā amhākaṃ kumārakassa sā evamāha ahaṃ khvayyā tumhe na jānāmi ke vā ime kassa vāti ayañca me ekadhītikā tīrogāmo ca gantabbo nāhaṃ dassāmīti sādhu bhante ayyo taṃ gaṇakiṃ dhītaraṃ dāpetu amhākaṃ kumārakassāti . athakho āyasmā udāyi yena sā gaṇakī tenupasaṅkami upasaṅkamitvā taṃ gaṇakiṃ etadavoca kissa imesaṃ dhītaraṃ Na desīti . ahaṃ khvayya ime na jānāmi ke vā ime kassa vāti ayañca me ekadhītikā tīrogāmo ca gantabbo nāhaṃ dassāmīti . Dehi imesaṃ ahaṃ ime jānāmīti . sace bhante ayyo jānāti dassāmīti . athakho sā gaṇakiṃ tesaṃ ājīvakasāvakānaṃ dhītaraṃ adāsi. Athakho te ājīvakasāvakā taṃ kumārikaṃ netvā māsaṃyeva suṇisābhogena bhuñjiṃsu tato aparena dāsībhogena bhuñjanti.