[426] Athakho sā gaṇakī ujjhāyati khīyati vipāceti evaṃ duggato hotu ayyo udāyi evaṃ dukkhito hotu ayyo udāyi evaṃ mā sukhaṃ labhatu ayyo udāyi yathā me kumārikā duggatā dukkhitā na sukhaṃ labhati pāpikāya sassuyā pāpakena sassurena pāpakena sāmikenāti . sāpi kho kumārikā ujjhāyati khīyati vipāceti evaṃ duggato hotu ayyo udāyi evaṃ dukkhito hotu ayyo udāyi evaṃ mā sukhaṃ labhatu ayyo udāyi yathāhaṃ duggatā dukkhitā na sukhaṃ labhāmi pāpikāya sassuyā pāpakena sassurena pāpakena sāmikenāti. {426.1} Aññāpi itthiyo asantuṭṭhā sassūhi vā sassurehi vā sāmikehi vā tā evaṃ oyācanti evaṃ duggato hotu ayyo udāyi evaṃ dukkhito hotu ayyo udāyi evaṃ mā sukhaṃ labhatu ayyo udāyi yathā mayaṃ duggatā dukkhitā na sukhaṃ labhāma pāpikāhi sassūhi pāpakehi sassurehi pāpakehi sāmikehīti . yā pana tā itthiyo santuṭṭhā sassūhi vā sassurehi vā sāmikehi vā tā evaṃ āyācanti evaṃ sukhito hotu ayyo udāyi evaṃ sajjito hotu ayyo udāyi evaṃ sukhamedhatu ayyo udāyi yathā mayaṃ sukhitā sajjitā sukhamedhāma bhaddakāhi sassūhi bhaddakehi sassurehi bhaddakehi sāmikehīti.

[427] Assosuṃ kho bhikkhū ekaccānaṃ itthīnaṃ oyācantīnaṃ ekaccānaṃ itthīnaṃ āyācantīnaṃ . ye te bhikkhū appicchā santuṭṭhā .pe. te ujjhāyanti khīyanti vipācenti kathaṃ hi nāma āyasmā udāyi sañcarittaṃ samāpajjissatīti . athakho te bhikkhū bhagavato etamatthaṃ ārocesuṃ . athakho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā āyasmantaṃ udāyiṃ paṭipucchi saccaṃ kira tvaṃ udāyi sañcarittaṃ samāpajjasīti . saccaṃ bhagavāti . Vigarahi buddho bhagavā ananucchavikaṃ moghapurisa ananulomikaṃ appaṭirūpaṃ assāmaṇakaṃ akappiyaṃ akaraṇīyaṃ kathaṃ hi nāma tvaṃ moghapurisa sañcarittaṃ samāpajjissasi netaṃ moghapurisa appasannānaṃ vā pasādāya .pe. Evañca pana bhikkhave imaṃ sikkhāpadaṃ uddiseyyātha {427.1} yo pana bhikkhu sañcarittaṃ samāpajjeyya itthiyā vā purisamatiṃ purisassa vā itthīmatiṃ jāyattane vā jārattane vā saṅghādisesoti. {427.2} Evañcidaṃ bhagavatā bhikkhūnaṃ sikkhāpadaṃ paññattaṃ hoti.