[500] Bhūtapubbaṃ bhikkhave aññataro bhikkhu himavantapasse viharati aññatarasmiṃ vanasaṇḍe . tassa kho pana bhikkhave vanasaṇḍassa avidūre mahantaṃ ninnaṃ pallalaṃ . athakho bhikkhave mahāsakuṇasaṅgho tasmiṃ pallale divasaṃ gocaraṃ caritvā sāyaṃ taṃ vanasaṇḍaṃ vāsāya upagacchati . athakho bhikkhave so bhikkhu tassa sakuṇasaṅghassa saddena ubbāḷho yenāhaṃ tenupasaṅkami upasaṅkamitvā maṃ abhivādetvā ekamantaṃ nisīdi. {500.1} Ekamantaṃ nisinnaṃ kho ahaṃ bhikkhave taṃ bhikkhuṃ etadavocaṃ kacci bhikkhu khamanīyaṃ kacci yāpanīyaṃ kaccisi appakilamathena addhānaṃ āgato kuto ca tvaṃ bhikkhu āgacchasīti . khamanīyaṃ bhagavā yāpanīyaṃ bhagavā appakilamathena cāhaṃ bhante addhānaṃ āgato atthi bhante himavantapasse mahāvanasaṇḍo tassa kho pana bhante vanasaṇḍassa avidūre mahantaṃ ninnaṃ pallalaṃ athakho bhante mahāsakuṇasaṅgho tasmiṃ pallale divasaṃ gocaraṃ caritvā sāyaṃ taṃ vanasaṇḍaṃ vāsāya upagacchati tato ahaṃ bhagavā āgacchāmi tassa sakuṇasaṅghassa saddena ubbāḷhoti . icchasi pana tvaṃ bhikkhu tassa sakuṇasaṅghassa Anāgamananti . icchāmahaṃ bhante tassa sakuṇasaṅghassa anāgamananti . Tenahi tvaṃ bhikkhu tattha gantvā taṃ vanasaṇḍaṃ ajjhogāhetvā rattiyā paṭhamaṃ yāmaṃ tikkhattuṃ saddamanussāvehi suṇantu me bhonto sakuṇā yāvatikā imasmiṃ vanasaṇḍe vāsaṃ upagatā pattena me attho ekekaṃ me bhonto pattaṃ dadantūti rattiyā majjhimaṃ yāmaṃ .pe. rattiyā pacchimaṃ yāmaṃ tikkhattuṃ saddamanussāvehi suṇantu me bhonto sakuṇā yāvatikā imasmiṃ vanasaṇḍe vāsaṃ upagatā pattena me attho ekekaṃ me bhonto pattaṃ dadantūti. {500.2} Athakho bhikkhave so bhikkhu tattha gantvā taṃ vanasaṇḍaṃ ajjhogāhetvā rattiyā paṭhamaṃ yāmaṃ tikkhattuṃ saddamanussāvesi suṇantu me bhonto sakuṇā yāvatikā imasmiṃ vanasaṇḍe vāsaṃ upagatā pattena me attho ekekaṃ me bhonto pattaṃ dadantūti rattiyā majjhimaṃ yāmaṃ .pe. rattiyā pacchimaṃ yāmaṃ tikkhattuṃ saddamanussāvesi suṇantu me bhonto sakuṇā yāvatikā imasmiṃ vanasaṇḍe vāsaṃ upagatā pattena me attho ekekaṃ me bhonto pattaṃ dadantūti . Athakho bhikkhave so sakuṇasaṅgho bhikkhu pattaṃ yācati bhikkhussa pattena atthoti tamhā vanasaṇḍā pakkāmi tathā pakkanto va ahosi na puna paccāgañchi . Tesaṃ hi nāma bhikkhave tiracchānagatānaṃ pāṇānaṃ amanāpā bhavissati yācanā amanāpā viññatti kimaṅgaṃ pana manussabhūtānaṃ.