[35] Antamaso tiracchānagatāyapīti tiracchānagatitthiyāpi methunaṃ dhammaṃ paṭisevitvā assamaṇo hoti asakyaputtiyo pageva manussitthiyā tena vuccati antamaso tiracchānagatāyapīti.

[36] Pārājiko hotīti seyyathāpi nāma puriso sīsacchinno abhabbo tena sarīrabandhanena jīvituṃ evameva bhikkhu methunaṃ dhammaṃ paṭisevitvā assamaṇo hoti asakyaputtiyo tena vuccati pārājiko hotīti.

[37] Asaṃvāsoti saṃvāso nāma ekakammaṃ ekuddeso samasikkhātā eso saṃvāso nāma so tena saddhiṃ natthi tena vuccati asaṃvāsoti.