[68] Tena kho pana samayena aññataro bhikkhu sāvatthiyaṃ andhavane divāvihāragato nipanno hoti . aññatarā gopālikā passitvā aṅgajāte abhinisīdi . so bhikkhu pavesanaṃ sādiyi paviṭṭhaṃ sādiyi ṭhitaṃ sādiyi uddharaṇaṃ sādiyi . tassa kukkuccaṃ ahosi .pe. āpattiṃ tvaṃ bhikkhu āpanno pārājikanti . tena kho pana samayena aññataro bhikkhu sāvatthiyaṃ andhavane divāvihāragato nipanno hoti . aññatarā ajapālikā passitvā .pe. aññatarā kaṭṭhahārikā passitvā .pe. Aññatarā gomayahārikā passitvā aṅgajāte abhinisīdi . so bhikkhu pavesanaṃ sādiyi paviṭṭhaṃ sādiyi ṭhitaṃ sādiyi uddharaṇaṃ sādiyi . tassa kukkuccaṃ ahosi .pe. Āpattiṃ tvaṃ bhikkhu āpanno pārājikanti.

[69] Tena kho pana samayena aññataro bhikkhu vesāliyaṃ mahāvane divāvihāragato nipanno hoti . aññatarā itthī passitvā aṅgajāte abhinisīditvā yāvadatthaṃ katvā sāmantā hasamānā ṭhitā hoti . so bhikkhu paṭibujjhitvā taṃ itthiṃ etadavoca tuyhidaṃ kammanti . āma mayhidaṃ kammanti . tassa kukkuccaṃ ahosi .pe. jānāsi tvaṃ bhikkhūti . nāhaṃ bhagavā jānāmīti . anāpatti bhikkhu ajānantassāti. Tena kho pana samayena aññataro bhikkhu vesāliyaṃ mahāvane divāvihāragato rukkhaṃ apassāya nipanno hoti . aññatarā itthī passitvā aṅgajāte abhinisīdi . so bhikkhu sahasā vuṭṭhāsi. Tassa kukkuccaṃ ahosi .pe. Sādiyi tvaṃ bhikkhūti . nāhaṃ bhagavā sādiyinti. Anāpatti bhikkhu asādiyantassāti. Tena kho pana samayena aññataro bhikkhu vesāliyaṃ mahāvane divāvihāragato rukkhaṃ apassāya nipanno hoti . aññatarā itthī passitvā aṅgajāte abhinisīdi . so bhikkhu akkamitvā pavaṭṭesi. Tassa kukkuccaṃ ahosi .pe. Sādiyi tvaṃ bhikkhūti . nāhaṃ bhagavā sādiyinti . anāpatti bhikkhu asādiyantassāti.

[70] Tena kho pana samayena aññataro bhikkhu vesāliyaṃ mahāvane kūṭāgārasālāyaṃ divāvihāragato dvāraṃ vivaritvā nipanno hoti . Tassa aṅgamaṅgāni vātupatthaddhāni honti . tena kho pana samayena sambahulā itthiyo gandhañca mālañca ādāya ārāmaṃ agamaṃsu vihārapekkhikāyo . athakho tā itthiyo taṃ bhikkhuṃ passitvā aṅgajāte abhinisīditvā yāvadatthaṃ katvā purisusabho vatāyanti vatvā gandhañca mālañca āropetvā pakkamiṃsu . bhikkhu kilinnaṃ passitvā bhagavato etamatthaṃ ārocesi . pañcahi bhikkhave ākārehi aṅgajātaṃ kammaniyaṃ hoti rāgena vaccena passāvena vātena uccāliṅgapāṇakadaṭṭhena Imehi kho bhikkhave pañcahākārehi aṅgajātaṃ kammaniyaṃ hoti aṭṭhānametaṃ bhikkhave anavakāso yaṃ tassa bhikkhuno rāgena aṅgajātaṃ kammaniyaṃ assa arahaṃ so bhikkhave bhikkhu anāpatti bhikkhave tassa bhikkhuno anujānāmi bhikkhave divā paṭisallīyantena dvāraṃ saṃvaritvā paṭisallīyitunti.