[129] Tena kho pana samayena aññataro piṇḍacāriko bhikkhu mahagghaṃ uttarattharaṇaṃ passitvā theyyacittaṃ uppādesi . tassa kukkuccaṃ ahosi .pe. anāpatti bhikkhu cittuppādeti . tena kho pana samayena aññataro piṇḍacāriko bhikkhu mahagghaṃ uttarattharaṇaṃ passitvā theyyacitto āmasi .pe. anāpatti bhikkhu pārājikassa Āpatti dukkaṭassāti .pe. theyyacitto phandāpesi .pe. Anāpatti bhikkhu pārājikassa āpatti thullaccayassāti .pe. Theyyacitto ṭhānā cāvesi . tassa kukkuccaṃ ahosi .pe. Āpattiṃ tvaṃ bhikkhu āpanno pārājikanti.

[130] Tena kho pana samayena aññataro bhikkhu divā bhaṇḍaṃ passitvā nimittaṃ akāsi rattiṃ avaharissāmīti . so taṃ maññamāno taṃ avahari . tassa kukkuccaṃ ahosi .pe. āpattiṃ tvaṃ bhikkhu āpanno pārājikanti .pe. taṃ maññamāno aññaṃ avahari .pe. Aññaṃ maññamāno taṃ avahari .pe. aññaṃ maññamāno aññaṃ avahari .pe. tassa kukkuccaṃ ahosi .pe. āpattiṃ tvaṃ bhikkhu āpanno pārājikanti . tena kho pana samayena aññataro bhikkhu divā bhaṇḍaṃ passitvā nimittaṃ akāsi rattiṃ avaharissāmīti . So taṃ maññamāno attano bhaṇḍaṃ avahari . tassa kukkuccaṃ ahosi .pe. Anāpatti bhikkhu pārājikassa āpatti dukkaṭassāti.

[131] Tena kho pana samayena aññataro bhikkhu aññassa bhaṇḍaṃ haranto sīse bhāraṃ theyyacitto āmasi .pe. anāpatti bhikkhu pārājikassa āpatti dukkaṭassāti .pe. theyyacitto phandāpesi .pe. anāpatti bhikkhu pārājikassa āpatti thullaccayassāti .pe. Theyyacitto khandhaṃ oropesi .pe. āpattiṃ tvaṃ bhikkhu āpanno Pārājikanti .pe. khandhe bhāraṃ theyyacitto āmasi .pe. Theyyacitto phandāpesi .pe. theyyacitto kaṭiṃ oropesi .pe. Kaṭiyā bhāraṃ theyyacitto āmasi .pe. theyyacitto phandāpesi .pe. theyyacitto hatthena aggahesi .pe. hatthe bhāraṃ theyyacitto bhūmiyaṃ nikkhipi .pe. theyyacitto bhūmito aggahesi . tassa kukkuccaṃ ahosi .pe. Āpattiṃ tvaṃ bhikkhu āpanno pārājikanti.