[134] Tena kho pana samayena aññataro bhikkhu susānaṃ gantvā abhinne sarīre paṃsukūlaṃ aggahesi . tasmiṃ ca sarīre peto adhivattho hoti . athakho so peto taṃ bhikkhuṃ etadavoca mā bhante mayhaṃ sāṭakaṃ aggahesīti . so bhikkhu anādiyanto Aggahesi . athakho taṃ sarīraṃ uṭṭhahitvā tassa bhikkhuno piṭṭhito piṭṭhito anubandhi . athakho so bhikkhu vihāraṃ pavisitvā dvāraṃ thakesi . athakho taṃ sarīraṃ tattheva paripati . tassa kukkuccaṃ ahosi .pe. anāpatti bhikkhu pārājikassa na ca bhikkhave abhinne sarīre paṃsukūlaṃ gahetabbaṃ yo gaṇheyya āpatti dukkaṭassāti.

[135] Tena kho pana samayena aññataro bhikkhu saṅghassa cīvare bhājiyamāne theyyacitto kusaṃ saṅkāmetvā cīvaraṃ aggahesi . tassa kukkuccaṃ ahosi .pe. Āpattiṃ tvaṃ bhikkhu āpanno pārājikanti.

[136] Tena kho pana samayena āyasmā ānando jantāghare aññatarassa bhikkhuno antaravāsakaṃ attano maññamāno nivāsesi . Athakho so bhikkhu āyasmantaṃ ānandaṃ etadavoca kissa me tvaṃ āvuso ānanda antaravāsakaṃ nivāsesīti . sakasaññī ahaṃ āvusoti. Bhagavato etamatthaṃ ārocesuṃ. Anāpatti bhikkhave sakasaññissāti.

[137] Tena kho pana samayena sambahulā bhikkhū gijjhakūṭā pabbatā orohantā sīhavighāsaṃ passitvā pacāpetvā paribhuñjiṃsu . tesaṃ kukkuccaṃ ahosi . bhagavato etamatthaṃ ārocesuṃ . anāpatti bhikkhave sīhavighāseti . tena kho pana samayena sambahulā bhikkhū gijjhakūṭā pabbatā orohantā byagghavighāsaṃ passitvā .pe. Dīpivighāsaṃ passitvā .pe. taracchavighāsaṃ passitvā .pe. Kokavighāsaṃ passitvā pacāpetvā paribhuñjiṃsu . tesaṃ kukkuccaṃ ahosi .pe. Anāpatti bhikkhave tiracchānagatapariggaheti.