[170] Tena kho pana samayena bhikkhū aññatarassa upāsakassa vihāraparibhogaṃ senāsanaṃ aññatra paribhuñjanti . athakho so upāsako ujjhāyati khīyati vipāceti kathaṃ hi nāma bhaddantā aññatra paribhogaṃ aññatra paribhuñjissantīti . bhagavato etamatthaṃ ārocesuṃ . na bhikkhave aññatra paribhogo aññatra paribhuñjitabbo yo paribhuñjeyya āpatti dukkaṭassāti. {170.1} Tena kho pana samayena bhikkhū uposathaggaṃpi sannisajjampi harituṃ kukkuccāyantā chamāyaṃ nisīdanti . gattānipi cīvarānipi paṃsukitāni honti . bhagavato etamatthaṃ ārocesuṃ. Anujānāmi bhikkhave tāvakālikaṃ haritunti.

[171] Tena kho pana samayena campāyaṃ thullanandāya bhikkhuniyā antevāsī bhikkhunī thullanandāya bhikkhuniyā upaṭṭhākakulaṃ gantvā ayyā icchati tekaṭullayāguṃ pātunti pacāpetvā haritvā attanā paribhuñji . sā jānitvā taṃ codesi assamaṇīsi tvanti . tassā kukkuccaṃ ahosi . athakho sā bhikkhunī bhikkhunīnaṃ etamatthaṃ ārocesi. Bhikkhuniyo bhikkhūnaṃ etamatthaṃ ārocesuṃ . bhikkhū bhagavato etamatthaṃ ārocesuṃ . anāpatti bhikkhave pārājikassa āpatti sampajānamusāvāde Pācittiyassāti. {171.1} Tena kho pana samayena rājagahe thullanandāya bhikkhuniyā antevāsī bhikkhunī thullanandāya bhikkhuniyā upaṭṭhākakulaṃ gantvā ayyā icchati madhugoḷakaṃ khāditunti pacāpetvā haritvā attanā paribhuñji . sā jānitvā taṃ codesi assamaṇīsi tvanti . tassā kukkuccaṃ ahosi .pe. anāpatti bhikkhave pārājikassa āpatti sampajānamusāvāde pācittiyassāti.

[172] Tena kho pana samayena vesāliyaṃ āyasmato ajjukassa upaṭṭhākassa gahapatino dve dārakā honti putto ca bhāgineyyo ca . athakho so gahapati āyasmantaṃ ajjukaṃ etadavoca imaṃ bhante okāsaṃ yo imesaṃ dvinnaṃ dārakānaṃ saddho hoti pasanno tassa ācikkheyyāsīti. So kālamakāsi . {172.1} Tena kho pana samayena tassa gahapatino bhāgineyyo saddho hoti pasanno. Athakho āyasmā ajjuko taṃ okāsaṃ tassa dārakassa ācikkhi. So tena sāpateyyena kuṭumbañca saṇṭhapesi dānañca paṭṭhapesi. Athakho tassa gahapatino putto āyasmantaṃ ānandaṃ etadavoca ko nu kho bhante ānanda pituno dāyajjo putto vā bhāgineyyo vāti . Putto kho āvuso pituno dāyajjoti . ayaṃ bhante ayyo ajjuko amhākaṃ Sāpateyyaṃ amhākaṃ methunakassa ācikkhīti . assamaṇo āvuso āyasmā ajjukoti . athakho āyasmā ajjuko āyasmantaṃ ānandaṃ etadavoca dehi me āvuso ānanda vinicchayanti. {172.2} Tena kho pana samayena āyasmā upāli āyasmato ajjukassa pakkho hoti . athakho āyasmā upāli āyasmantaṃ ānandaṃ etadavoca yo nu kho āvuso ānanda sāmikena imaṃ okāsaṃ itthannāmassa ācikkhāhīti vutto tassa ācikkhati kiṃ so āpajjatīti . na so bhante kiñci āpajjati antamaso dukkaṭamattampīti . ayaṃ āvuso āyasmā ajjuko sāmikena imaṃ okāsaṃ itthannāmassa ācikkhāhīti vutto tassa ācikkhi anāpatti āvuso āyasmato ajjukassāti.