[263] Bhūtapubbaṃ bhante devāsurasaṅgāmo samupabyuḷho ahosi. Tasmiṃ kho pana bhante saṅgāme devā jiniṃsu asurā va parājayiṃsu. Tassa mayhaṃ bhante taṃ saṅgāmaṃ abhivijinitvā abhivijitasaṅgāmassa etadahosi yā cevadāni dibbā ojā yā ca asurā ojā ubhayamettha devā paribhuñjissantīti so kho pana me bhante vedapaṭilābho somanassapaṭilābho sadaṇḍāvacaro sasatthāvacaro na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattati yo kho pana me ayaṃ bhante bhagavato dhammaṃ sutvā vedapaṭilābho somanassapaṭilābho so adaṇḍāvacaro asatthāvacaro ekantanibbibāya virāgāya nirodhāya upasamāya abhiññāya sambodhāya nibbānāya saṃvattatīti. {263.1} Kathaṃ pana tvaṃ devānaminda atthavasaṃ sampassamāno evarūpaṃ vedapaṭilābhaṃ somanassapaṭilābhaṃ pavedesīti . cha kho ahaṃ bhante atthavase sampassamāno evarūpaṃ vedapaṭilābhaṃ somanassapaṭilābhaṃ pavedemi.

[264] Idheva tiṭṭhamānassa devabhūtassa me sato punevāyu va me laddho evaṃ jānāhi mārisāti imaṃ kho ahaṃ bhante paṭhamaṃ atthavasaṃ sampassamāno evarūpaṃ vedapaṭilābhaṃ somanassapaṭilābhaṃ pavedemi.

[265] Cutāhaṃ diviyā kāyā āyuṃ hitvā amānusaṃ amūḷho gabbhamessāmi yattha me ramatī manoti imaṃ kho ahaṃ bhante dutiyaṃ atthavasaṃ sampassamāno evarūpaṃ vedapaṭilābhaṃ somanassapaṭilābhaṃ pavedemi.

[266] Svāhaṃ amūḷhapañhassa viharaṃ sāsane rato ñāyena viharissāmi sampajāno paṭissatoti imaṃ kho ahaṃ bhante tatiyaṃ atthavasaṃ sampassamāno evarūpaṃ vedapaṭilābhaṃ somanassapaṭilābhaṃ pavedemi.