[172] Evamme sutaṃ . ekaṃ samayaṃ bhagavā rājagahe viharati veḷuvane kalandakanivāpe . tena kho pana samayena siṅgālako gahapatiputto kālasseva vuṭṭhāya rājagahā nikkhamitvā allavattho allakeso pañjaliko puthuddisā namassati puratthimaṃ disaṃ dakkhiṇaṃ disaṃ pacchimaṃ disaṃ uttaraṃ disaṃ heṭṭhimaṃ disaṃ uparimaṃ disaṃ.

[173] Athakho bhagavā pubbaṇhasamayaṃ nivāsetvā pattacīvaramādāya rājagahaṃ piṇḍāya pāvisi . addasā kho bhagavā siṅgālakaṃ gahapatiputtaṃ kālasseva vuṭṭhāya rājagahā nikkhamitvā allavatthaṃ allakesaṃ pañjalikaṃ puthuddisā namassantaṃ puratthimaṃ disaṃ dakkhiṇaṃ disaṃ pacchimaṃ disaṃ uttaraṃ disaṃ heṭṭhimaṃ disaṃ uparimaṃ disaṃ disvāna siṅgālakaṃ gahapatiputtaṃ etadavoca kinnu tvaṃ gahapatiputta kālasseva vuṭṭhāya rājagahā nikkhamitvā allavattho allakeso pañjaliko puthuddisā namassasi puratthimaṃ disaṃ .pe. uparimaṃ disanti . pitā mama bhante kālaṃ karonto evaṃ avaca disā tāta namasseyyāsīti so kho ahaṃ bhante pitu vacanaṃ sakkaronto garukaronto mānento pūjento kālasseva vuṭṭhāya rājagahā nikkhamitvā allavattho allakeso pañjaliko puthuddisā namassāmi puratthimaṃ disaṃ .pe. Uparimaṃ disanti . na kho gahapatiputta ariyassa vinaye evaṃ cha disā namassitabbāti . yathākathaṃ pana bhante ariyassa vinaye cha disā namassitabbā sādhu me bhante bhagavā tathā dhammaṃ desetu yathā ariyassa vinaye cha disā namassitabbāti.

[174] Tenahi gahapatiputta suṇāhi sādhukaṃ manasikarohi bhāsissāmīti . evaṃ bhanteti kho siṅgālako gahapatiputto bhagavato paccassosi . bhagavā etadavoca yato kho gahapatiputta ariyasāvakassa cattāro kammakkilesā pahīnā honti catūhi ṭhānehi pāpakammaṃ na karoti cha ca bhogānaṃ apāyamukhāni na sevati so evaṃ cuddasapāpakāpagato chadisāpaṭicchādī hoti ubholokavijayāya paṭipanno hoti tassa ayañceva loko āraddho hoti paro ca loko. So kāyassa bhedā paraṃ maraṇā sugatiṃ saggaṃ lokaṃ upapajjati. {174.1} Katamassa cattāro kammakkilesā pahīnā honti . Pāṇātipāto kho gahapatiputta kammakkileso adinnādānaṃ kammakkileso kāmesu micchācāro kammakkileso musāvādo kammakkileso imassa cattāro kammakkilesā pahīnā hontīti . idamavoca bhagavā idaṃ vatvāna sugato athāparaṃ etadavoca satthā