[209] Vipassissa namatthu cakkhumantassa sirīmato sikhissapi namatthu sabbabhūtānukampino. Vessabhussa namatthu nhātakassa tapassino Namatthu kakusandhassa mārasenappamaddino. Konāgamanassa namatthu brāhmaṇassa vusīmato kassapassa namatthu vippamuttassa sabbadhi. Aṅgīrasassa namatthu sakyaputtassa sirīmato yo imaṃ dhammamadesesi sabbadukkhā panūdanaṃ. Ye cāpi nibbutā loke yathābhūtaṃ vipassisuṃ te janā apisuṇā mahantā vītasāradā. Hitaṃ devamanussānaṃ yaṃ namassanti gotamaṃ vijjācaraṇasampannaṃ mahantaṃ vītasāradaṃ. Yato uggacchati suriyo ādicco maṇḍalīmahā yassa cuggacchamānassa saṃvarīpi nirujjhati. Yassa cuggate suriye divasoti pavuccati rahadopi tattha gambhīro samuddo saritodako evantaṃ tattha jānanti samuddo saritodako.
[210] Ito sā purimā disā iti naṃ ācikkhatī jano yaṃ disaṃ abhipāleti mahārājā yasassi so gandhabbānaṃ ādhipati dhataraṭṭho iti nāmaso ramatī naccagītehi gandhabbehi purakkhato. Puttāpi tassa bahavo ekanāmāti me sutaṃ asīti dasa eko ca indanāmā mahabbalā Te cāpi buddhaṃ disvāna buddhaṃ ādiccabandhunaṃ dūrato va namassanti mahantaṃ vītasāradaṃ. Namo te purisājañña namo te purisuttama kusalena samekkhasi amanussāpi taṃ vandanti. Sutaṃ netaṃ abhiṇhaso tasmā evaṃ vademhase jinaṃ vandatha gotamaṃ jinaṃ vandāma gotamaṃ vijjācaraṇasampannaṃ buddhaṃ vandāma gotamaṃ. Yena petā pavuccanti pisuṇā piṭṭhimaṃsikā pāṇātipātino luddā corā nekatikā janā.
[211] Ito sā dakkhiṇā disā iti naṃ ācikkhatī jano yaṃ disaṃ abhipāleti mahārājā yasassi so kumbhaṇḍānaṃ ādhipati viruḷho iti nāmaso ramatī naccagītehi kumbhaṇḍehi purakkhato. Puttāpi tassa bahavo ekanāmāti me sutaṃ asīti dasa eko ca indanāmā mahabbalā te cāpi buddhaṃ disvāna buddhaṃ ādiccabandhunaṃ dūrato va namassanti mahantaṃ vītasāradaṃ. Namo te purisājañña namo te purisuttama kusalena samekkhasi amanussāpi taṃ vandanti. Sutaṃ netaṃ abhiṇhaso tasmā evaṃ vademhase Jinaṃ vandatha gotamaṃ jinaṃ vandāma gotamaṃ vijjācaraṇasampannaṃ buddhaṃ vandāma gotamaṃ. Yattha coggacchati suriyo ādicco maṇḍalīmahā yassa coggacchamānassa divasopi nirujjhati yassa coggate suriye saṃvarīti pavuccati. Rahadopi tattha gambhīro samuddo saritodako evantaṃ tattha jānanti samuddo saritodako.