[213] Ito sā uttarā disā iti naṃ ācikkhatī jano yaṃ disaṃ abhipāleti mahārājā yasassi so. Yakkhānaṃ ādhipati kuvero iti nāmaso ramatī naccagītehi yakkhehi purakkhato. Puttāpi tassa bahavo ekanāmāti me sutaṃ asīti dasa eko ca indanāmā mahabbalā. Te cāpi buddhaṃ disvāna buddhaṃ ādiccabandhunaṃ dūrato va namassanti mahantaṃ vītasāradaṃ. Namo te purisājañña namo te purisuttama kusalena samekkhasi amanussāpi taṃ vandanti. Sutaṃ netaṃ abhiṇhaso tasmā evaṃ vademhase jinaṃ vandatha gotamaṃ jinaṃ vandāma gotamaṃ vijjācaraṇasampannaṃ buddhaṃ vandāma gotamanti.
[214] Ayaṃ kho sā mārisa āṭānāṭiyā rakkhā bhikkhūnaṃ bhikkhunīnaṃ upāsakānaṃ upāsikānaṃ guttiyā rakkhāya avihiṃsāya phāsuvihārāyāti . Yassa kassaci mārisa bhikkhussa vā bhikkhuniyā vā upāsakassa vā upāsikāya vā ayaṃ āṭānāṭiyā rakkhā sugahitā bhavissati samattā pariyāputā tañce amanusso yakkho vā yakkhinī vā yakkhapotako vā yakkhapotikā vā yakkhamahāmatto vā yakkhapārisajjo vā yakkhapacāro vā gandhabbo vā gandhabbī vā gandhabbapotako vā gandhabbapotikā vā gandhabbamahāmatto vā gandhabbapārisajjo vā gandhabbapacāro vā kumbhaṇḍo vā kumbhaṇḍī vā kumbhaṇḍapotako vā kumbhaṇḍapotikā vā kumbhaṇḍamahāmatto vā kumbhaṇḍapārisajjo vā kumbhaṇḍapacāro vā nāgo vā nāginī vā nāgapotako vā Nāgapotikā vā nāgamahāmatto vā nāgapārisajjo vā nāgapacāro vā paduṭṭhacitto bhikkhuṃ vā bhikkhuniṃ vā upāsakaṃ vā upāsikaṃ vā gacchantaṃ vā anugaccheyya ṭhitaṃ vā upatiṭṭheyya nisinnaṃ vā upanisīdeyya nipannaṃ vā upanipajjeyya . na me so mārisa amanusso labheyya gāmesu vā nigamesu vā sakkāraṃ vā garukāraṃ vā . na me so mārisa amanusso labheyya āḷakamandāya nāma rājadhāniyā vatthuṃ vā vāsaṃ vā . na me so mārisa amanusso labheyya yakkhānaṃ samitiṃ gantuṃ. {214.1} Apissu naṃ mārisa amanussā anavayhampi kareyyuṃ avivayhaṃ . apissu naṃ mārisa amanussā attāhi paripuṇṇāhi paribhāsāhi paribhāseyyuṃ . apissu naṃ mārisa amanussā rittampi pattaṃ sīse nikkujjeyyuṃ . apissu naṃ mārisa amanussā sattadhāpissa muddhaṃ phāleyyuṃ santi hi mārisa amanussā caṇḍā ruddhā rabhasā te neva mahārājānaṃ ādiyanti na mahārājānaṃ purisakānaṃ ādiyanti na mahārājānaṃ purisakānaṃ purisakānaṃ ādiyanti . te kho te mārisa amanussā mahārājānaṃ avaruddhā nāma vuccanti. {214.2} Seyyathāpi mārisa rañño māgadhassa vijite corā te neva rañño māgadhassa ādiyanti na rañño māgadhassa purisakānaṃ ādiyanti na rañño māgadhassa purisakānaṃ purisakānaṃ ādiyanti te kho te mārisa mahācorā rañño māgadhassa avaruddhā nāma vuccanti evameva kho mārisa santi hi amanussā caṇḍā ruddhā rabhasā te neva Mahārājānaṃ ādiyanti na mahārājānaṃ purisakānaṃ ādiyanti na mahārājānaṃ purisakānaṃ purisakānaṃ ādiyanti te kho te mārisa amanussā mahārājānaṃ avaruddhā nāma vuccanti. {214.3} Yo hi koci mārisa amanusso yakkho vā yakkhinī vā yakkhapotako vā yakkhapotikā vā yakkhamahāmatto vā yakkhapārisajjo vā yakkhapacāro vā gandhabbo vā gandhabbī vā gandhabbapotako vā gandhabbapotikā vā gandhabbamahāmatto vā gandhabbapārisajjo vā gandhabbapacāro vā kumbhaṇḍo vā kumbhaṇḍī vā kumbhaṇḍapotako vā kumbhaṇḍapotikā vā kumbhaṇḍamahāmatto vā kumbhaṇḍapārisajjo vā kumbhaṇḍapacāro vā nāgo vā nāginī vā nāgapotako vā nāgapotikā vā nāgamahāmatto vā nāgapārisajjo vā nāgapacāro vā paduṭṭhacitto bhikkhuṃ vā bhikkhuniṃ vā upāsakaṃ vā upāsikaṃ vā gacchantaṃ vā anugaccheyya ṭhitaṃ vā upatiṭṭheyya nisinnaṃ vā upanisīdeyya nipannaṃ vā upanipajjeyya. Imesaṃ yakkhānaṃ mahāyakkhānaṃ senāpatīnaṃ mahāsenāpatīnaṃ ujjhāpetabbaṃ vikkanditabbaṃ viravitabbaṃ ayaṃ yakkho gaṇhāti ayaṃ yakkho āvisati ayaṃ yakkho heṭheti ayaṃ yakkho viheṭheti ayaṃ yakkho hiṃsati ayaṃ yakkho vihiṃsati ayaṃ yakkho na muñcatīti.