[243] Catasso dhātuyo paṭhavīdhātu āpodhātu tejodhātu vāyodhātu.

[244] Cattāro āhārā kabaḷīkāro āhāro oḷāriko vā sukhumo vā phasso dutiyo manosañcetanā tatiyā viññāṇaṃ catutthaṃ.

[245] Catasso viññāṇaṭṭhitiyo rūpūpāyaṃ vā āvuso viññāṇaṃ tiṭṭhamānaṃ tiṭṭhati rūpārammaṇaṃ rūpappatiṭṭhaṃ nandūpasevanaṃ vuḍḍhiṃ viruḷhiṃ vepullaṃ āpajjati . vedanūpāyaṃ vā āvuso . saññūpāyaṃ vā āvuso . saṅkhārūpāyaṃ vā āvuso . viññāṇaṃ tiṭṭhamānaṃ tiṭṭhati saṅkhārārammaṇaṃ saṅkhārappatiṭṭhaṃ nandūpasevanaṃ vuḍḍhiṃ viruḷhiṃ vepullaṃ āpajjati.

[246] Cattāri agatigamanāni chandāgatiṃ gacchati dosāgatiṃ gacchati mohāgatiṃ gacchati bhayāgatiṃ gacchati.