[321] Cha anuttariyāni dassanānuttariyaṃ savanānuttariyaṃ lābhānuttariyaṃ sikkhānuttariyaṃ pāricariyānuttariyaṃ anussatānuttariyaṃ.

[322] Cha anussatiṭṭhānāni buddhānussati dhammānussati saṅghānussati sīlānussati cāgānussati devatānussati.

[323] Cha satatavihārā idhāvuso bhikkhu cakkhunā rūpaṃ disvā neva sumano hoti na dummano upekkhako ca viharati sato sampajāno. Sotena saddaṃ sutvā .pe. ghānena gandhaṃ ghāyitvā .pe. jivhāya rasaṃ sāyitvā .pe. kāyena phoṭṭhabbaṃ phusitvā .pe. manasā dhammaṃ viññāya neva sumano hoti na dummano upekkhako ca viharati sato sampajāno.

[324] Chaḷābhijātiyo idhāvuso ekacco kaṇhābhijātiko samāno kaṇhaṃ dhammaṃ abhijāyati . idhāvuso ekacco kaṇhābhijātiko samāno sukkaṃ dhammaṃ abhijāyati . idhāvuso ekacco kaṇhābhijātiko samāno akaṇhaṃ asukkaṃ nibbānaṃ abhijāyati . idhāvuso ekacco sukkābhijātiko samāno sukkaṃ dhammaṃ abhijāyati . idhāvuso ekacco sukkābhijātiko samāno kaṇhaṃ dhammaṃ abhijāyati . idhāvuso ekacco sukkābhijātiko samāno akaṇhaṃ asukkaṃ nibbānaṃ abhijāyati.