[22] Athakho bhagavā yena nigrodho paribbājako tenupasaṅkami. Athakho nigrodho paribbājako bhagavantaṃ etadavoca etu kho bhante bhagavā svāgataṃ bhante bhagavato cirassaṃ kho bhante bhagavā imaṃ pariyāyamakāsi yadidaṃ idhāgamanāya nisīdatu bhante bhagavā idamāsanaṃ paññattanti . nisīdi bhagavā paññatte āsane . nigrodhopi kho paribbājako aññataraṃ nīcaṃ āsanaṃ gahetvā ekamantaṃ nisīdi . Ekamantaṃ nisinnaṃ kho nigrodhaṃ paribbājakaṃ bhagavā etadavoca kāyanottha nigrodha etarahi kathāya sannisinnā kā ca pana vo antarākathā vippakatāti. {22.1} Evaṃ vutte nigrodho paribbājako bhagavantaṃ etadavoca idha mayaṃ bhante addasāma bhagavantaṃ sumāgadhāya tīre moranivāpe abbhokāse caṅkamantaṃ disvā evaṃ avocumhā sace samaṇo gotamo imaṃ parisaṃ āgaccheyya imantaṃ pañhaṃ puccheyyāma ko nāma so bhante bhagavato dhammo yena bhagavā sāvake vineti yena bhagavatā sāvakā vinītā Assāsappattā paṭijānanti ajjhāsayaṃ ādibrahmacariyanti ayaṃ kho no bhante antarākathā vippakatā atha bhagavā anuppattoti. {22.2} Dujjānaṃ kho panetaṃ nigrodha tayā aññadiṭṭhikena aññakhantikena aññarucikena aññatra āyogena aññatra ācariyakena yenāhaṃ sāvake vinemi yena mayā sāvakā vinītā assāsappattā paṭijānanti ajjhāsayaṃ ādibrahmacariyanti iṅgha tvaṃ maṃ nigrodha sake ācariyake adhijigucche pañhaṃ puccha kathaṃsantā nu kho bhante tapojigucchā paripuṇṇā hoti kathaṃ aparipuṇṇāti . evaṃ vutte te paribbājakā unnādino uccāsaddamahāsaddā ahesuṃ acchariyaṃ vata bho abbhutaṃ vata bho samaṇassa gotamassa mahiddhikatā mahānubhāvatā yatra hi nāma sakavādaṃ ṭhapessati paravādena pavāressatīti.

[23] Athakho nigrodho paribbājako te paribbājake appasadde katvā bhagavantaṃ etadavoca mayaṃ kho bhante tapojigucchavādā tapojigucchaṃ allīnā viharāma kathaṃsantā nu kho bhante tapojigucchā paripuṇṇā hoti kathaṃ aparipuṇṇāti. {23.1} Idha nigrodha tapassī acelako hoti muttācāro hatthāvalekhano na ehibhaddantiko na tiṭṭhabhaddantiko na abhihataṃ na uddissa kataṃ na nimantanaṃ sādiyati so na kumbhimukhā paṭiggaṇhāti na kalopimukhā paṭiggaṇhāti na eḷakamantaraṃ na udukkhalamantaraṃ na musalamantaraṃ na daṇḍamantaraṃ na dvinnaṃ bhuñjamānānaṃ na gabbhiniyā na pāyamānāya Na parisantaragatāya na saṅkittīsu na yattha sā upaṭṭhitā hoti na yattha makkhikā saṇḍasaṇḍacārinī na macchaṃ na maṃsaṃ na suraṃ na merayaṃ na thusodakaṃ pivati. {23.2} So ekāgāriko vā hoti ekālopiko dvāgāriko vā hoti dvālopiko sattāgāriko vā hoti sattālopiko ekissāpi dattiyā yāpeti dvīhipi dattīhi yāpeti sattahipi dattīhi yāpeti ekāhikaṃpi āhāraṃ āhāreti dvīhikaṃpi āhāraṃ āhāreti sattahikaṃpi āhāraṃ āhāreti iti evarūpaṃ addhamāsikaṃ pariyāyabhattabhojanānuyogamanuyutto viharati. {23.3} So sākabhakkho vā hoti sāmākabhakkho vā hoti nivārabhakkho vā hoti daddulakabhakkho vā hoti sātabhakkho vā hoti kaṇṇabhakkho vā hoti ācāmabhakkho vā hoti piññākabhakkho vā hoti tiṇabhakkho vā hoti gomayabhakkho vā hoti vanamūlaphalāhāro yāpeti pavattaphalabhojī. {23.4} So sāṇānipi dhāreti masāṇānipi dhāreti chavadussānipi dhāreti paṃsukūlānipi dhāreti tiriṭānipi dhāreti ajinānipi dhāreti ajinakkhipaṃpi dhāreti kusacīraṃpi dhāreti vākacīraṃpi dhāreti phalakacīraṃpi dhāreti kesakambalaṃpi dhāreti vālakambalaṃpi dhāreti ulukapakkhikaṃpi dhāreti kesamassulocakopi hoti kesamassulocanānuyogamanuyutto ubhaṭṭhakopi hoti āsanapaṭikkhitto ukkuṭikopi hoti ukkuṭikappadhānamanuyutto kaṇṭakapassayikopi hoti kaṇṭakapassaye seyyaṃ kappeti phalakaseyyaṃpi kappeti ṭaṇḍilaseyyaṃpi kappeti ekapassayikopi hoti rajojalladharo Abbhokāsikopi hoti yathāsanthatiko vekaṭikopi hoti vikaṭa- bhojanānuyogamanuyutto āpānakopi hoti āpānakattamanuyutto sāyaṃtatiyakaṃpi udakorohanānuyogamanuyutto viharati . taṃ kiṃ maññasi nigrodha yadi evaṃ sante tapojigucchā paripuṇṇā hoti aparipuṇṇāti. Addhā kho bhante evaṃ sante tapojigucchā paripuṇṇā hoti no aparipuṇṇāti . evaṃ paripuṇṇāyapi kho ahaṃ nigrodha tapojigucchāya anekavihite upakkilese vadāmīti.