[24] Yathākathaṃ pana bhante bhagavā evaṃparipuṇṇāya tapojigucchāya anekavihite upakkilese vadatīti . idha nigrodha tapassī tapaṃ samādiyati so tena tapasā attamano hoti paripuṇṇasaṅkappo . yaṃpi nigrodha tapassī tapaṃ samādiyati so tena tapasā attamano hoti paripuṇṇasaṅkappo ayaṃpi kho nigrodha tapassino upakkileso hoti. {24.1} Puna caparaṃ nigrodha tapassī tapaṃ samādiyati so tena tapasā attānukkaṃseti paraṃ vambheti . yaṃpi nigrodha tapassī tapaṃ samādiyati so tena tapasā attānukkaṃseti paraṃ vambheti ayaṃpi kho nigrodha tapassino upakkileso hoti. {24.2} Puna caparaṃ nigrodha tapassī tapaṃ samādiyati so tena tapasā majjati mucchati madamāpajjati . yaṃpi nigrodha tapassī tapaṃ samādiyati so tena tapasā majjati mucchati madamāpajjati ayaṃpi kho nigrodha tapassino upakkileso hoti. {24.3} Puna caparaṃ nigrodha tapassī tapaṃ samādiyati so tena tapasā Lābhasakkārasilokaṃ abhinibbatteti so tena lābhasakkārasilokena attamano hoti paripuṇṇasaṅkappo . yaṃpi nigrodha tapassī tapaṃ samādiyati so tena tapasā lābhasakkārasilokaṃ abhinibbatteti so tena lābhasakkārasilokena attamano hoti paripuṇṇasaṅkappo ayaṃpi kho nigrodha tapassino upakkileso hoti . puna caparaṃ nigrodha tapassī tapaṃ samādiyati so tena tapasā lābhasakkārasilokaṃ abhinibbatteti so tena lābhasakkārasilokena attānukkaṃseti paraṃ vambheti . yaṃpi nigrodha tapassī tapaṃ samādiyati so tena tapasā lābhasakkārasilokaṃ abhinibbatteti so tena lābhasakkārasilokena attānukkaṃseti paraṃ vambheti ayaṃpi kho nigrodha tapassino upakkileso hoti . puna caparaṃ nigrodha tapassī tapaṃ samādiyati so tena tapasā lābhasakkārasilokaṃ abhinibbatteti so tena lābhasakkārasilokena majjati mucchati madamāpajjati . yaṃpi nigrodha tapassī tapaṃ samādiyati so tena tapasā lābhasakkārasilokaṃ abhinibbatteti so tena lābhasakkārasilokena majjati mucchati madamāpajjati ayaṃpi kho nigrodha tapassino upakkileso hoti. {24.4} Puna caparaṃ nigrodha tapassī tapaṃ samādiyati bhojanesu vodāsaṃ āpajjati idaṃ me khamati idaṃ me na khamatīti. So yañca khvāssa na khamati taṃ sāpekkho pakhahati yaṃ panassa khamati taṃ gadhito mucchito ajjhāpanno anādīnavadassāvī anissaraṇapañño paribhuñjati ayaṃ kho nigrodha tapassino upakkileso hoti. Puna caparaṃ nigrodha tapassī tapaṃ samādiyati lābhasakkārasilokanikantihetu sakkarissanti maṃ rājāno rājamahāmattā khattiyā brāhmaṇā gahapatikā titthiyāti ayaṃpi kho nigrodha tapassino upakkileso hoti. {24.5} Puna caparaṃ nigrodha tapassī aññataraṃ samaṇaṃ vā brāhmaṇaṃ vā kuto apasādetā hoti kiṃ panāyaṃ sambahulājīvo sabbasabbaṃ saṃbhakkheti seyyathīdaṃ mūlabījaṃ khandhabījaṃ phalubījaṃ aggabījaṃ bījabījameva pañcamaṃ asanivicakkaṃ dantakūṭaṃ samaṇappavādenāti ayaṃpi kho nigrodha tapassino upakkileso hoti . puna caparaṃ nigrodha tapassī passati aññataraṃ samaṇaṃ vā brāhmaṇaṃ vā kulesu sakkariyamānaṃ garukariyamānaṃ māniyamānaṃ pūjiyamānaṃ . tassa evaṃ hoti imamhi nāma sambahulājīvaṃ kulesu sakkaronti garukaronti mānenti pūjenti maṃ pana tapassiṃ lūkhājīviṃ kulesu na sakkaronti na garukaronti na mānenti na pūjentīti . iti so issāmacchariyaṃ kulesu uppādetā hoti ayaṃpi kho nigrodha tapassino upakkileso hoti. {24.6} Puna caparaṃ nigrodha tapassī āpāthakanisādī hoti ayaṃpi kho nigrodha tapassino upakkileso hoti . puna caparaṃ nigrodha tapassī attānaṃ adassayamāno kulesu carati idaṃpi me tapasmiṃ idaṃpi me tapasminti ayaṃpi kho nigrodha tapassino upakkileso hoti . Puna caparaṃ nigrodha tapassī kiñcideva paṭicchannaṃ sevati so khamati te idanti puṭṭho samāno akkhamamānaṃ āha khamatīti Khamamānaṃ āha na khamatīti . iti so sampajānamusā bhāsitā hoti ayaṃpi kho nigrodha tapassino upakkileso hoti . puna caparaṃ nigrodha tapassī tathāgatassa vā tathāgatasāvakassa vā dhammaṃ desentassa santaṃyeva pariyāyaṃ anuññeyyaṃ nānujānāti ayaṃpi kho nigrodha tapassino upakkileso hoti. {24.7} Puna caparaṃ nigrodha tapassī kodhano hoti upanāhī. Yaṃpi nigrodha tapassī kodhano hoti upanāhī ayaṃpi kho nigrodha tapassino upakkileso hoti . puna caparaṃ nigrodha tapassī makkhī hoti palāsī assukī hoti maccharī saṭho hoti māyāvī thaddho hoti atimānī pāpiccho hoti pāpikānaṃ icchānaṃ vasaṅgato micchādiṭṭhiko hoti antagāhikāya diṭṭhiyā samannāgato sandiṭṭhiparāmāsī hoti ādhānagāhī duppaṭinissaggī . Yaṃpi kho nigrodha tapassī sandiṭṭhiparāmāsī hoti ādhānagāhī duppaṭinissaggī ayaṃpi kho nigrodha tapassino upakkileso hoti. {24.8} Taṃ kiṃ maññasi nigrodha yadime tapojigucchā upakkilesā vā anupakkilesā vāti . addhā kho ime bhante tapojigucchā upakkilesā no anupakkilesā ṭhānaṃ kho panetaṃ bhante vijjati yaṃ idhekacco tapassī sabbeheva imehi upakkilesehi samannāgato assa ko pana vādo aññataraññatarenāti.