[29] Yadā aññāsi sandhāno gahapati aññadatthu khodānime aññatitthiyā paribbājakā bhagavato bhāsitaṃ sussūsanti sotaṃ odahanti aññācittaṃ upaṭṭhapentīti atha nigrodhaṃ paribbājakaṃ etadavoca iti kho bhante nigrodha yaṃ maṃ tvaṃ avacāsi yagghe gahapati jāneyyāsi kena samaṇo gotamo saddhiṃ sallapati kena sākacchaṃ samāpajjati kena paññāveyyattiyaṃ samāpajjati suññāgārahatā samaṇassa gotamassa paññā aparisāvacaro samaṇo gotamo nālaṃ sallāpāya so antapantāneva sevati seyyathāpi nāma gokāṇā pariyantacārinī antapantāneva sevati evamevaṃ suññāgārahatā samaṇassa gotamassa paññā aparisāvacaro samaṇo gotamo nālaṃ sallāpāya so antapantāneva sevati iṅgha gahapati samaṇo gotamo imaṃ parisaṃ āgaccheyya ekapañheneva naṃ saṃsādeyyāma tucchakumbhīva naṃ maññe orodheyyāmāti athakho so bhante bhagavā arahaṃ sammāsambuddho idhānuppatto aparisāvacaraṃ pana naṃ karotha gokāṇaṃ pariyantacāriniṃ karotha ekapañheneva naṃ saṃsādetha tucchakumbhīva naṃ maññe orodhethāti. Evaṃ vutte nigrodho paribbājako tuṇhībhūto maṅkubhūto pattakkhandho adhomukho pajjhāyanto appaṭibhāṇo nisīdi.
[30] Athakho bhagavā nigrodhaṃ paribbājakaṃ tuṇhībhūtaṃ maṅkubhūtaṃ pattakkhandhaṃ adhomukhaṃ pajjhāyantaṃ appaṭibhāṇaṃ viditvā nigrodhaṃ Paribbājakaṃ etadavoca saccaṃ nigrodha bhāsitā te esā vācāti . Saccaṃ bhante bhāsitā me esā vācā yathābālena yathāmūḷhena yathāakusalenāti . taṃ kiṃ maññasi nigrodha kinti te sutaṃ paribbājakānaṃ vuḍḍhānaṃ mahallakānaṃ ācariyapācariyānaṃ bhāsamānānaṃ ye te ahesuṃ atītamaddhānaṃ arahanto sammāsambuddhā evaṃsute bhagavanto saṅgamma samāgamma unnādino uccāsaddamahāsaddā anekavihitaṃ tiracchānakathaṃ anuyuttā vihariṃsu seyyathīdaṃ rājakathaṃ corakathaṃ .pe. itibhavābhavakathaṃ iti vā seyyathāpi tvaṃ etarahi sācariyako udāhu evaṃsute bhagavanto araññavanapatthāni pantāni senāsanāni paṭisevanti appasaddāni appanigghosāni vijanavātāni manussarāhaseyyakāni paṭisallānasāruppāni seyyathāpāhametarahīti. {30.1} Sutametaṃ bhante paribbājakānaṃ vuḍḍhānaṃ mahallakānaṃ ācariyapācariyānaṃ bhāsamānānaṃ ye te ahesuṃ atītamaddhānaṃ arahanto sammāsambuddhā na evaṃsute bhagavanto evaṃ saṅgamma samāgamma unnādino uccāsaddamahāsaddā anekavihitaṃ tiracchānakathaṃ anuyuttā viharanti seyyathīdaṃ rājakathaṃ corakathaṃ .pe. itibhavābhavakathaṃ iti vā seyyathāpāhametarahi sācariyako evaṃsute bhagavanto araññavanapatthāni pantāni senāsanāni paṭisevanti appasaddāni appanigghosāni vijanavātāni manussarāhaseyyakāni paṭisallānasāruppāni seyyathāpi bhagavā etarahīti . tassa kho nigrodha viññussa sato mahallakassa na etadahosi buddho so bhagavā Sambodhāya dhammaṃ deseti danto so bhagavā damathāya dhammaṃ deseti santo so bhagavā samathāya dhammaṃ deseti tiṇṇo so bhagavā taraṇāya dhammaṃ deseti parinibbuto so bhagavā parinibbānāya dhammaṃ desetīti.