[39] Athakho bhikkhave rājā khattiyo muddhāvasitto amacce pārisajje gaṇakamahāmatte anīkaṭṭhe dovārike mantassājīvino sannipātetvā ariyaṃ cakkavattivattaṃ pucchi . tassa te ariyaṃ cakkavattivattaṃ puṭṭhā byākariṃsu . tesaṃ sutvā dhammikañhi kho rakkhāvaraṇaguttiṃ saṃvidahi no ca kho adhanānaṃ dhanamanuppadāsi . Adhanānaṃ dhane nānuppadiyamāne dāḷiddiyaṃ vepullaṃ agamāsi. Dāḷiddiye vepullaṃ gate aññataro puriso paresaṃ adinnaṃ theyyasaṅkhātaṃ ādiyi . tamenaṃ aggahesuṃ gahetvā rañño khattiyassa muddhāvasittassa dassesuṃ ayaṃ deva puriso paresaṃ adinnaṃ theyyasaṅkhātaṃ ādiyīti . evaṃ vutte bhikkhave rājā khattiyo Muddhāvasitto taṃ purisaṃ etadavoca saccaṃ kira tvaṃ ambho purisa paresaṃ adinnaṃ theyyasaṅkhātaṃ ādiyasīti . saccaṃ devāti. Kiṃkāraṇāti. Na hi deva jīvāmīti . athakho bhikkhave rājā khattiyo muddhāvasitto tassa purisassa dhanamanuppadāsi iminā tvaṃ ambho purisa dhanena attanā ca jīvāhi mātāpitaro ca posehi puttadārañca posehi kammante [2]- payojehi samaṇesu brāhmaṇesu uddhaggikaṃ dakkhiṇaṃ patiṭṭhapehi sovaggikaṃ sukhavipākaṃ saggasaṃvattanikanti . evaṃ devāti kho bhikkhave so puriso rañño khattiyassa muddhāvasittassa paccassosi. {39.1} Aññataropi kho bhikkhave puriso paresaṃ adinnaṃ theyyasaṅkhātaṃ ādiyi . tamenaṃ aggahesuṃ gahetvā rañño khattiyassa muddhāvasittassa dassesuṃ ayaṃ deva puriso paresaṃ adinnaṃ theyyasaṅkhātaṃ ādiyīti. Evaṃ vutte bhikkhave rājā khattiyo muddhāvasitto taṃ purisaṃ etadavoca saccaṃ kira tvaṃ ambho purisa paresaṃ adinnaṃ theyyasaṅkhātaṃ ādiyasīti. Saccaṃ devāti. Kiṃkāraṇāti. Na hi deva jīvāmīti. {39.2} Athakho bhikkhave rājā khattiyo muddhāvasitto tassa purisassa dhanamanuppadāsi iminā tvaṃ ambho purisa dhanena attanā ca jīvāhi mātāpitaro ca posehi puttadārañca posehi kammante [2]- payojehi samaṇesu brāhmaṇesu uddhaggikaṃ dakkhiṇaṃ patiṭṭhapehi sovaggikaṃ sukhavipākaṃ saggasaṃvattanikanti . evaṃ devāti kho bhikkhave so puriso rañño khattiyassa muddhāvasittassa Paccassosi . assosuṃ kho bhikkhave manussā ye kira bho paresaṃ adinnaṃ theyyasaṅkhātaṃ ādiyanti tesaṃ rājā anuppadetīti . sutvāna tesaṃ etadahosi yannūna mayaṃpi paresaṃ adinnaṃ theyyasaṅkhātaṃ ādiyeyyāmāti.