[40] Athakho bhikkhave aññataro puriso paresaṃ adinnaṃ theyyasaṅkhātaṃ ādiyi . tamenaṃ aggahesuṃ gahetvā rañño khattiyassa muddhāvasittassa dassesuṃ ayaṃ deva puriso paresaṃ adinnaṃ theyyasaṅkhātaṃ ādiyīti . Evaṃ vutte bhikkhave rājā khattiyo muddhāvasitto taṃ purisaṃ etadavoca saccaṃ kira tvaṃ ambho purisa paresaṃ adinnaṃ theyyasaṅkhātaṃ ādiyasīti. Saccaṃ devāti . kiṃkāraṇāti . na hi deva jīvāmīti. Athakho bhikkhave rañño khattiyassa muddhāvasittassa etadahosi sace kho ahaṃ yo yo paresaṃ adinnaṃ theyyasaṅkhātaṃ ādiyissati tassa tassa dhanamanuppadassāmi evamidaṃ adinnādānaṃ pavaḍḍhissati yannūnāhaṃ imaṃ purisaṃ sunisedhaṃ nisedheyyaṃ mūlaghacchaṃ kareyyaṃ sīsamassa chindeyyanti. {40.1} Athakho bhikkhave rājā khattiyo muddhāvasitto purise āṇāpesi tenahi bhaṇe imaṃ purisaṃ daḷhāya rajjuyā pacchābāhuṃ gāḷhabandhanaṃ bandhitvā khuramuṇḍaṃ karitvā kharassarena paṇavena rathiyāya rathiyaṃ siṅghāṭakena siṅghāṭakaṃ parinetvā dakkhiṇena dvārena nikkhamitvā dakkhiṇato nagarassa sunisedhaṃ nisedhetha mūlaghacchaṃ karotha sīsamassa chindathāti . evaṃ Devāti kho bhikkhave te purisā rañño khattiyassa muddhāvasittassa paṭissutvā taṃ purisaṃ daḷhāya rajjuyā pacchābāhuṃ gāḷhabandhanaṃ bandhitvā khuramuṇḍaṃ karitvā kharassarena paṇavena rathiyāya rathiyaṃ siṅghāṭakena siṅghāṭakaṃ parinetvā dakkhiṇena dvārena nikkhamitvā dakkhiṇato nagarassa sunisedhaṃ nisedhesuṃ mūlaghacchaṃ akaṃsu sīsamassa chindiṃsu.
[41] Assosuṃ kho bhikkhave manussā ye kira bho paresaṃ adinnaṃ theyyasaṅkhātaṃ ādiyanti te rājā sunisedhaṃ nisedheti mūlaghacchaṃ karoti sīsāni tesaṃ chindatīti . sutvāna tesaṃ etadahosi yannūna mayaṃpi tiṇhāni satthāni kārāpeyyāma tiṇhāni satthāni kārāpetvā yesaṃ adinnaṃ theyyasaṅkhātaṃ ādiyissāma te sunisedhaṃ nisedhessāma mulaghacchaṃ karissāma sīsāni nesaṃ chindissāmāti . Te tiṇhāni satthāni kārāpesuṃ tiṇhāni satthāni kārāpetvā gāmaghātaṃpi upakkamiṃsu kātuṃ nigamaghātaṃpi upakkamiṃsu kātuṃ nagaraghātaṃpi upakkamiṃsu kātuṃ panthadūhaṇampi upakkamiṃsu kātuṃ . yesaṃ te adinnaṃ theyyasaṅkhātaṃ ādiyanti te sunisedhaṃ nisedhenti mūlaghacchaṃ karonti sīsāni nesaṃ chindanti.