[46] Bhavissati bhikkhave so samayo yaṃ imesaṃ manussānaṃ dasavassāyukā puttā bhavissanti dasavassāyukesu bhikkhave manussesu pañcavassikā kumārikā alaṃpateyyā bhavissanti dasavassāyukesu bhikkhave manussesu imāni rasāni antaradhāyissanti seyyathīdaṃ sappi navanītaṃ telaṃ madhu phāṇitaṃ loṇaṃ dasavassāyukesu bhikkhave manussesu kudrusako aggabhojanaṃ bhavissati seyyathāpi bhikkhave etarahi sālimaṃsodano aggabhojanaṃ {46.1} evameva kho bhikkhave dasavassāyukesu manussesu kudrusako aggabhojanaṃ bhavissati dasavassāyukesu bhikkhave manussesu dasa kusalakammapathā sabbena sabbaṃ antaradhāyissanti dasa akusalakammapathā ativiya dippissanti dasavassāyukesu bhikkhave manussesu kusalantipi na bhavissati kuto pana kusalassa kārako dasavassāyukesu bhikkhave manussesu ye te bhavissanti amatteyyā apetteyyā asāmaññā abrahmaññā nakulejeṭṭhāpacāyino te pūjā ca bhavissanti pāsaṃsā ca seyyathāpi bhikkhave etarahi matteyyā petteyyā sāmaññā brahmaññā kulejeṭṭhāpacāyino te pūjā ca pāsaṃsā ca {46.2} evameva kho bhikkhave dasavassāyukesu manussesu ye te bhavissanti amatteyyā apetteyyā asāmaññā abrahmaññā nakulejeṭṭhāpacāyino te pūjā ca bhavissanti pāsaṃsā ca dasavassāyukesu bhikkhave manussesu na bhavissati Mātāti vā mātucchāti vā pitāti vā pitucchāti vā mātulānīti vā ācariyabhariyāti vā garūnaṃ dārāti vā sambhedaṃ loko gamissati yathā ajeḷakā kukkuṭā sūkarā soṇā sigālā dasavassāyukesu bhikkhave manussesu tesaṃ sattānaṃ aññamaññamhi tibbo āghāto paccupaṭṭhito bhavissati tibbo byāpādo tibbo manopadoso tibbaṃ vadhakacittaṃ mātupi puttamhi . Puttassapi mātari . pitupi puttamhi . puttassapi pitari . bhātupi bhaginiyā . bhaginiyā bhātari tibbo āghāto paccupaṭṭhito bhavissati tibbo byāpādo tibbo manopadoso tibbaṃ vadhakacittaṃ seyyathāpi bhikkhave māgavikassa migaṃ disvā tibbo āghāto paccupaṭṭhito hoti tibbo byāpādo tibbo manopadoso tibbaṃ vadhakacittaṃ {46.3} evameva kho bhikkhave dasavassāyukesu manussesu tesaṃ sattānaṃ aññamaññamhi tibbo āghāto paccupaṭṭhito bhavissati tibbo byāpādo tibbo manopadoso tibbaṃ vadhakacittaṃ mātupi puttamhi . puttassapi mātari . pitupi puttamhi . puttassapi pitari . bhātupi bhaginiyā . bhaginiyāpi bhātari tibbo āghāto paccupaṭṭhito bhavissati tibbo byāpādo tibbo manopadoso tibbaṃ vadhakacittaṃ.