[5] Ekamidāhaṃ bhaggava samayaṃ vesāliyaṃ viharāmi mahāvane kūṭāgārasālāyaṃ . tena kho pana samayena acelo kaḷāramajjako vesāliyaṃ paṭivasati lābhaggappatto ceva yasaggappatto ca vajjigāme. Tassa satta vattapadāni samattāni samādinnāni honti yāvajīvaṃ acelo assaṃ na vatthaṃ paridaheyyaṃ yāvajīvaṃ brahmacārī assaṃ na methunaṃ dhammaṃ paṭiseveyyaṃ yāvajīvaṃ surāmaṃseneva yāpeyyaṃ na Odanakummāsaṃ bhuñjeyyaṃ puratthimena vesāliṃ udenaṃ nāma cetiyaṃ taṃ nātikkameyyaṃ dakkhiṇena vesāliṃ gotamakaṃ nāma cetiyaṃ taṃ nātikkameyyaṃ pacchimena vesāliṃ sattambaṃ nāma cetiyaṃ taṃ nātikkameyyaṃ uttarena vesāliṃ bahuputtakannāma cetiyaṃ taṃ nātikkameyyanti so imesaṃ sattannaṃ vattapadānaṃ samādānahetu lābhaggappatto ceva yasaggappatto ca vajjigāme. {5.1} Athakho bhaggava sunakkhatto licchaviputto yena acelo kaḷāramajjako tenupasaṅkami upasaṅkamitvā acelaṃ kaḷāramajjakaṃ pañhaṃ apucchi . tassa acelo kaḷāramajjako pañhaṃ puṭṭho na saṃpāyāsi asaṃpāyanto kopañca dosañca appaccayañca pātvākāsi . athakho bhaggava sunakkhattassa licchaviputtassa etadahosi sādhurūpaṃ vata bho arahantaṃ samaṇaṃ āsādiyimhase mā vata no bho ahosi dīgharattaṃ ahitāya dukkhāyāti. {5.2} Athakho bhaggava sunakkhatto licchaviputto yenāhaṃ tenupasaṅkami upasaṅkamitvā maṃ abhivādetvā ekamantaṃ nisīdi . Ekamantaṃ nisinnaṃ kho ahaṃ bhaggava sunakkhattaṃ licchaviputtaṃ etadavocaṃ tvaṃpi nāma moghapurisa sakyaputtiyo paṭijānissasīti . kiṃ pana maṃ bhante bhagavā evamāha tvaṃpi nāma moghapurisa sakyaputtiyo paṭijānissasīti . nanu tvaṃ sunakkhatta acelaṃ kaḷāramajjakaṃ upasaṅkamitvā pañhaṃ apucchi tassa te acelo kaḷāramajjako pañhaṃ puṭṭho na saṃpāyāsi asaṃpāyanto kopañca Dosañca appaccayañca pātvākāsi tassa te etadahosi sādhurūpaṃ vata bho arahantaṃ samaṇaṃ āsādiyimhase mā vata no bho ahosi dīgharattaṃ ahitāya dukkhāyāti . evaṃ bhante kiṃ pana bhante bhagavā arahattassa maccharāyatīti . na kho ahaṃ moghapurisa arahattassa maccharāyāmi apica tuyhevetaṃ pāpakaṃ diṭṭhigataṃ uppannaṃ taṃ pajaha mā te ahosi dīgharattaṃ ahitāya dukkhāyāti . yaṃ kho panetaṃ sunakkhatta maññasi acelaṃ kaḷāramajjakaṃ sādhurūpo arahaṃ samaṇoti so nacirasseva parihito sānucariko vicaranto odanakummāsaṃ bhuñjamāno sabbāneva vesāliyāni cetiyāni samatikkamitvā yasā nihīno kālaṃ karissatīti . athakho bhaggava acelo kaḷāramajjako nacirasseva parihito sānucariko vicaranto odanakummāsaṃ bhuñjamāno sabbāneva vesāliyāni cetiyāni samatikkamitvā yasā nihīno kālamakāsi. {5.3} Assosi kho bhaggava sunakkhatto licchaviputto acelo kira kaḷāramajjako parihito sānucariko vicaranto odanakummāsaṃ bhuñjamāno sabbāneva vesāliyāni cetiyāni samatikkamitvā yasā nihīno kālaṃ karoti . athakho bhaggava sunakkhatto licchaviputto yenāhaṃ tenupasaṅkami upasaṅkamitvā maṃ abhivādetvā ekamantaṃ nisīdi . ekamantaṃ nisinnaṃ kho ahaṃ bhaggava sunakkhattaṃ licchaviputtaṃ etadavocaṃ taṃ kiṃ maññasi sunakkhatta yatheva te ahaṃ acelaṃ kaḷāramajjakaṃ ārabbha byākāsiṃ tatheva taṃ vipākaṃ no aññathā vāti . Yatheva me bhante bhagavā acelaṃ kaḷāramajjakaṃ ārabbha byākāsi tatheva taṃ vipākaṃ no aññathāti . taṃ kiṃ maññasi sunakkhatta yadi evaṃ sante kataṃ vā hoti uttarimanussadhammā iddhipāṭihāriyaṃ akataṃ vāti . athakho bhante evaṃ sante kataṃ hoti uttarimanussadhammā iddhipāṭihāriyaṃ no akatanti . evaṃpi kho maṃ tvaṃ moghapurisa uttarimanussadhammā iddhipāṭihāriyaṃ karontaṃ evaṃ vadesi na hi pana me bhante bhagavā uttarimanussadhammā iddhipāṭihāriyaṃ karotīti passa moghapurisa yāvañca te idaṃ aparaddhanti . evaṃpi kho bhaggava sunakkhatto licchaviputto mayā vuccamāno apakkameva imasmā dhammavinayā yathā taṃ āpāyiko nerayiko.