[59] Athakho tesaṃ vāseṭṭhā sattānaṃ padālatāya antarahitāya akaṭṭhapāko sāli pāturahosi akaṇo athuso suddho sugandho taṇḍulapphalo . yantaṃ sāyaṃ sāyamāsāya āharanti pāto taṃ hoti pakkaṃ paṭiviruḷhaṃ yantaṃ pāto pātarāsāya āharanti sāyaṃ taṃ hoti pakkaṃ paṭiviruḷhaṃ nāpadānaṃ paññāyati . athakho [2]- vāseṭṭhā sattā akaṭṭhapākaṃ sāliṃ paribhuñjantā tabbhakkhā tadāhārā ciraṃ dīghamaddhānaṃ aṭṭhaṃsu. {59.1} Yathā yathā kho te vāseṭṭhā sattā akaṭṭhapākaṃ sāliṃ paribhuñjantā tabbhakkhā tadāhārā ciraṃ dīghamaddhānaṃ aṭṭhaṃsu tathā tathā tesaṃ sattānaṃ bhiyyoso mattāya kharattañceva kāyasmiṃ okkami vaṇṇavevaṇṇatā ca paññāyittha . itthiyā ca itthīliṅgaṃ pāturahosi purisassa purisaliṅgaṃ. Itthī ca sudaṃ ativelaṃ purisaṃ upanijjhāyati puriso ca itthiṃ. Tesaṃ ativelaṃ aññamaññaṃ upanijjhāyantānaṃ sārāgo udapādi pariḷāho kāyasmiṃ okkami. Te pariḷāhapaccayā methunaṃ dhammaṃ paṭiseviṃsu. {59.2} Ye kho pana te vāseṭṭhā tena samayena sattā passanti methunaṃ dhammaṃ paṭisevante aññe paṃsuṃ khipanti aññe seṭṭhiṃ khipanti aññe gomayaṃ khipanti nassa vasali nassa vasalīti . Kathañhi nāma satto sattassa evarūpaṃ karissatīti . tadetarahipi manussā ekaccesu janapadesu vadhaniyā nibbuyhamānāya aññe paṃsuṃ khipanti aññe seṭṭhiṃ khipanti aññe gomayaṃ khipanti . tadeva porāṇaṃ aggaññaṃ akkharaṃ anussaranti na tvevassa atthaṃ ājānanti.

[60] Adhammasammataṃ taṃ kho pana vāseṭṭhā tena samayena hoti tadetarahi dhammasammataṃ . ye kho pana te vāseṭṭhā tena samayena sattā methunaṃ dhammaṃ paṭisevanti temāsaṃpi dvemāsaṃpi na labhanti gāmaṃ vā nigamaṃ vā pavisituṃ . yato kho vāseṭṭhā te sattā tasmiṃ asaddhamme ativelaṃ pātabyataṃ āpajjiṃsu atha agārāni upakkamiṃsu kātuṃ tasseva asaddhammassa paṭicchādanatthaṃ . athakho vāseṭṭhā aññatarassa sattassa alasajātikassa etadahosi ambho kimevāhaṃ vihaññāmi sāliṃ āharanto sāyaṃ sāyamāsāya pāto pātarāsāya yannūnāhaṃ sāliṃ āhareyyaṃ sakideva sāyaṃ pātarāsāyāti. Nappaṭiviruḷhaṃ apadānaṃ paññāyittha saṇḍasaṇḍā sālayo aṭṭhaṃsu.