[61] Athakho te vāseṭṭhā sattā sannipatiṃsu sannipatitvā anutthaniṃsu pāpakā vata bho dhammā sattesu pātubhūtā mayaṃ hi pubbe manomayā ahumhā pītibhakkhā sayaṃpabhā antalikkhacarā subhaṭṭhāyino ciraṃ dīghamaddhānaṃ aṭṭhamhā tesaṃ no amhākaṃ kadāci karahaci ciraṃ dīghassa addhuno accayena rasapaṭhavī udakasmiṃ samantāni sā ahosi vaṇṇasampannā gandhasampannā rasasampannā te mayaṃ rasapaṭhaviṃ hatthehi āluppakārakaṃ upakkamimhā paribhuñjituṃ tesanno rasapaṭhaviṃ hatthehi āluppakārakaṃ upakkamataṃ paribhuñjituṃ sayaṃpabhā antaradhāyi sayaṃpabhāya antarahitāya candimasuriyā pāturahesuṃ candimasuriyesu pātubhūtesu nakkhattāni tārakarūpāni pāturahesuṃ nakkhattesu tārakarūpesu pātubhūtesu rattindivā paññāyiṃsu rattindivesu paññāyamānesu māsaddhamāsā paññāyiṃsu māsaddhamāsesu paññāyamānesu utusaṃvaccharā paññāyiṃsu te mayaṃ rasapaṭhaviṃ paribhuñjantā tabbhakkhā tadāhārā ciraṃ dīghamaddhānaṃ aṭṭhamhā tesaṃ no pāpakānaṃyeva akusalānaṃ dhammānaṃ pātubhāvā rasapaṭhavī antaradhāyi rasapaṭhaviyā antarahitāya bhūmipappaṭiko pāturahosi so ahosi vaṇṇasampanno gandhasampanno rasasampanno te mayaṃ bhūmipappaṭikaṃ upakkamimhā paribhuñjituṃ te mayaṃ taṃ paribhuñjantā tabbhakkhā tadāhārā ciraṃ dīghamaddhānaṃ aṭṭhamhā tesaṃ no pāpakānaṃyeva akusalānaṃ dhammānaṃ Pātubhāvā bhūmipappaṭiko antaradhāyi bhūmipappaṭike antarahite padālatā pāturahosi sā ahosi vaṇṇasampannā gandhasampannā rasasampannā te mayaṃ padālataṃ upakkamimhā paribhuñjituṃ te mayaṃ taṃ paribhuñjantā tabbhakkhā tadāhārā ciraṃ dīghamaddhānaṃ aṭṭhamhā tesaṃ no pāpakānaṃyeva akusalānaṃ dhammānaṃ pātubhāvā padālatā antaradhāyi padālatāya antarahitāya akaṭṭhapāko sāli pāturahosi akaṇo athuso suddho sugandho taṇḍulapphalo yantaṃ sāyaṃ sāyamāsāya āharāma pāto taṃ hoti pakkaṃ paṭiviruḷhaṃ yantaṃ pāto pātarāsāya āharāma sāyantaṃ hoti pakkaṃ paṭiviruḷhaṃ nāpadānaṃ paññāyittha te mayaṃ akaṭṭhapākaṃ sāliṃ paribhuñjantā tabbhakkhā tadāhārā ciraṃ dīghamaddhānaṃ aṭṭhamhā tesanno pāpakānaṃyeva akusalānaṃ dhammānaṃ pātubhāvā kaṇopi taṇḍulaṃ pariyonaddhi thusopi taṇḍulaṃ pariyonaddhi lūnaṃpi nappaṭiviruḷhaṃ apadānampi paññāyittha saṇḍasaṇḍā sālayo ṭhitā yannūna mayaṃ sāliṃ vibhajeyyāma mariyādaṃ ṭhapeyyāmāti. Athakho [1]- vāseṭṭhā sattā sāliṃ vibhajiṃsu mariyādaṃ ṭhapesuṃ.