[62] Athakho vāseṭṭhā aññataro satto lolajātiko sakaṃ bhāgaṃ parirakkhanto aññataraṃ bhāgaṃ adinnaṃ ādiyitvā paribhuñji . Tamenaṃ aggahesuṃ gahetvā etadavocuṃ pāpakaṃ vata bho satta karosi yatra hi nāma sakaṃ bhāgaṃ parirakkhanto aññataraṃ bhāgaṃ Adinnaṃ ādiyitvā paribhuñjasi mā bho satta puna evarūpamakāsīti. Evaṃ bhoti kho vāseṭṭhā so satto tesaṃ sattānaṃ paccassosi . Dutiyampi kho vāseṭṭhā so satto .pe. tatiyampi kho vāseṭṭhā so satto sakaṃ bhāgaṃ parirakkhanto aññataraṃ bhāgaṃ adinnaṃ ādiyitvā paribhuñji . tamenaṃ aggahesuṃ gahetvā etadavocuṃ pāpakaṃ vata bho satta karosi yatra hi nāma sakaṃ bhāgaṃ parirakkhanto aññataraṃ bhāgaṃ adinnaṃ ādiyitvā paribhuñji mā bho satta punapi evarūpaṃ akāsīti . aññe pāṇinā pahariṃsu aññe leḍḍunā pahariṃsu aññe daṇḍena pahariṃsu . tadagge kho pana vāseṭṭhā adinnādānaṃ paññāyati garahā paññāyati musāvādo paññāyati daṇḍādānaṃ paññāyati. {62.1} Athakho seṭṭhasattā sannipatiṃsu sannipatitvā anutthaniṃsu pāpakā vata bho dhammā sattesu pātubhūtā yatra hi nāma adinnādānaṃ paññāyissati garahā paññāyissati musāvādo paññāyissati daṇḍādānaṃ paññāyissati yannūna mayaṃ ekaṃ sattaṃ sammanneyyāma yo no sammākhīyitabbaṃ khīyeyya sammāgarahitabbaṃ garaheyya sammāpabbājetabbaṃ pabbājeyya mayaṃ panassa sālīnaṃ bhāgaṃ anupadassāmāti. {62.2} Athakho te vāseṭṭhā sattā yo nesaṃ satto abhirūpataro ca dassanīyataro ca pāsādikataro ca mahesakkhataro ca taṃ sattaṃ upasaṅkamitvā etadavocuṃ ehi bho satta sammākhīyitabbaṃ khīyi sammāgarahitabbaṃ garahi sammāpabbājetabbaṃ Pabbājehi mayaṃ pana vo sālīnaṃ bhāgaṃ anupadassāmāti . evaṃ bhoti kho so vāseṭṭhā satto tesaṃ sattānaṃ paṭissutvā sammākhīyitabbaṃ khīyi sammāgarahitabbaṃ garahi sammāpabbājetabbaṃ pabbājesi . te panassa sālīnaṃ bhāgaṃ anupadaṃsu.