[63] Mahājanasammatoti kho vāseṭṭhā mahāsammatotveva paṭhamaṃ akkharaṃ upanibbattaṃ . khettānaṃ adhipatīti kho vāseṭṭhā khattiyo khattiyotveva dutiyaṃ akkharaṃ upanibbattaṃ . dhammena paresaṃ rañjetīti kho vāseṭṭhā rājā rājātveva tatiyaṃ akkharaṃ upanibbattaṃ. Iti kho vāseṭṭhā evamevassa khattiyamaṇḍalassa porāṇena aggaññena akkharena abhinibbatti ahosi . Tesaṃyeva sattānaṃ aññesaṃ sadisānaṃyeva no asadisānaṃ dhammeneva no adhammena . Dhammo hi vāseṭṭhā seṭṭho janetasmiṃ diṭṭhe ceva dhamme abhisamparāyañca.
[64] Athakho tesaṃ sattānaṃyeva ekaccānaṃ etadahosi pāpakā vata bho dhammā sattesu pātubhūtā yatra hi nāma adinnādānaṃ paññāyissati garahā paññāyissati musāvādo paññāyissati daṇḍādānaṃ paññāyissati pabbājanaṃ paññāyissati yannūna mayaṃ pāpake akusale dhamme vāheyyāmāti . te pāpake akusale dhamme vāhesuṃ. Pāpake akusale dhamme vāhentīti kho vāseṭṭhā brāhmaṇātveva paṭhamaṃ akkharaṃ upanibbattaṃ . te araññāyatane paṇṇakuṭiyo ca karitvā paṇṇakuṭīsu jhāyanti . vītaṅgārā vītadhūmā Paṇṇamusalā sāyaṃ sāyamāsāya pāto pātarāsāya gāmanigama- rājadhāniyo osaranti ghāsamesanā . te ghāsaṃ paṭilabhitvā punadeva araññāyatane paṇṇakuṭīsu jhāyanti . tamenaṃ manussā disvā evamāhaṃsu ime kho bho sattā araññāyatane paṇṇakuṭiyo karitvā paṇṇakuṭīsu jhāyanti vītaṅgārā vītadhūmā paṇṇamusalā sāyaṃ sāyamāsāya pāto pātarāsāya gāmanigamarājadhāniyo osaranti ghāsamesanā . te ghāsampaṭilabhitvā punadeva araññāyatane paṇṇakuṭīsu jhāyanti . te kho vāseṭṭhā jhāyikā jhāyikātveva dutiyaṃ akkharaṃ upanibbattaṃ tesaṃyeva kho vāseṭṭhā sattānaṃ ekacce sattā araññāyatane paṇṇakuṭīsu [3]- jhānaṃ anabhisambhunamānā gāmasāmantaṃ nigamasāmantaṃ osaritvā gaṇṭhe karontā āgacchanti. {64.1} Tamenaṃ manussā disvā evamāhaṃsu ime kho pana bho sattā araññāyatane paṇṇakuṭīsu jhānaṃ anabhisambhunamānā gāmasāmantaṃ nigamasāmantaṃ osaritvā gaṇṭhe karontā gacchanti . nadānime jhāyanti nadānime jhāyantīti kho vāseṭṭhā ajjhāyikā ajjhāyikātveva tatiyaṃ akkharaṃ upanibbattaṃ . hīnasammataṃ kho pana vāseṭṭhā tena samayena hoti tadetarahi seṭṭhasammataṃ . iti kho vāseṭṭhā evametassa brāhmaṇamaṇḍalassa porāṇena aggaññena akkharena abhinibbatti ahosi tesaṃyeva sattānaṃ aññesaṃ sadisānaṃyeva no asadisānaṃ dhammeneva no adhammena . Dhammo hi vāseṭṭhā seṭṭho janetasmiṃ diṭṭhe ceva dhamme abhisamparāyañca.