[71] Imesaṃ hi vāseṭṭhā catunnaṃ vaṇṇānaṃ yo hoti bhikkhu arahaṃ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaññojano sammadaññāvimutto so nesaṃ aggamakkhāyati dhammeneva no adhammena . dhammo hi vāseṭṭhā seṭṭho janetasmiṃ diṭṭhe ceva dhamme abhisamparāyañca . brahmunāpi vāseṭṭhā sanaṅkumārena gāthā bhāsitā

[72] Khattiyo seṭṭho janetasmiṃ ye gottapaṭisārino vijjācaraṇasampanno so seṭṭho devamānuseti. Sāpi kho panesā vāseṭṭhā brahmunā sanaṅkumārena gāthā sugītā no duggītā subhāsitā no dubbhāsitā atthasañhitā no anatthasañhitā anumatā mayā. Ahaṃpi vāseṭṭhā evaṃ vadāmi khattiyo seṭṭho janetasmiṃ ye gottapaṭisārino vijjācaraṇasampanno so seṭṭho devamānuseti. Idamavoca bhagavā . attamanā vāseṭṭhabhāradvājā bhagavato bhāsitaṃ abhinandunti. Aggaññasuttaṃ niṭṭhitaṃ catutthaṃ. -------------