[84] Aparaṃ pana bhante etadānuttariyaṃ yathā bhagavā dhammaṃ deseti purisasīlasamācāre . idha bhante ekacco sacco cassa saddho ca na ca kuhako na ca lapako na ca nemittiko na ca nipphesiko na ca lābhena lābhaṃ nijigiṃsanako indriyesu guttadvāro bhojanesu mattaññū samakārī jāgariyānuyogamanuyutto atandito āraddhaviriyo jhāyī satimā kalyāṇapaṭibhāṇo gatimā dhitimā matimā na ca kāmesu giddho sato ca nipako care . etadānuttariyaṃ bhante purisasīlasamācāre.

[85] Aparaṃ pana bhante etadānuttariyaṃ yathā bhagavā dhammaṃ deseti anusāsanavidhāsu catasso imā bhante anusāsanavidhā . Jānāti bhante bhagavā paraṃ puggalaṃ paccattaṃ yonisomanasikārā ayaṃ puggalo yathānusiṭṭhaṃ tathāpaṭipajjamāno tiṇṇaṃ saññojanānaṃ parikkhayā sotāpanno bhavissati avinipātadhammo niyato sambodhiparāyanoti. Jānāti bhante bhagavā paraṃ puggalaṃ paccattaṃ yonisomanasikārā ayaṃ puggalo yathānusiṭṭhaṃ tathāpaṭipajjamāno tiṇṇaṃ saññojanānaṃ parikkhayā rāgadosamohānaṃ tanuttā sakadāgāmī bhavissati sakideva imaṃ lokaṃ āgantvā dukkhassantaṃ karissatīti . jānāti bhante bhagavā paraṃ puggalaṃ paccattaṃ yonisomanasikārā ayaṃ puggalo yathānusiṭṭhaṃ tathāpaṭipajjamāno pañcannaṃ orambhāgiyānaṃ saññojanānaṃ parikkhayā opapātiko bhavissati tattha parinibbāyī anāvattidhammo tasmā lokāti . jānāti bhante bhagavā paraṃ puggalaṃ paccattaṃ yonisomanasikārā ayaṃ puggalo yathānusiṭṭhaṃ tathāpaṭipajjamāno āsavānaṃ parikkhayā anāsavañcetovimuttiṃ paññāvimuttiṃ diṭṭhe va dhamme sayaṃ abhiññā sacchikatvā upasampajja viharissatīti. Etadānuttariyaṃ bhante anusāsanavidhāsu .

[86] Aparaṃ pana bhante etadānuttariyaṃ yathā bhagavā dhammaṃ deseti parapuggalavimuttiñāṇe . jānāti bhante bhagavā paraṃ puggalaṃ paccattaṃ yonisomanasikārā ayaṃ puggalo tiṇṇaṃ saññojanānaṃ parikkhayā sotāpanno bhavissati avinipātadhammo niyato sambodhiparāyanoti . jānāti bhante bhagavā paraṃ puggalaṃ paccattaṃ Yonisomanasikārā ayaṃ puggalo tiṇṇaṃ saññojanānaṃ parikkhayā rāgadosamohānaṃ tanuttā sakadāgāmī sakideva imaṃ lokaṃ āgantvā dukkhassantaṃ karissatīti . jānāti bhante bhagavā paraṃ puggalaṃ paccattaṃ yonisomanasikārā ayaṃ puggalo pañcannaṃ orambhāgiyānaṃ saññojanānaṃ parikkhayā opapātiko [1]- tattha parinibbāyī anāvattidhammo tasmā lokāti . jānāti bhante bhagavā paraṃ puggalaṃ paccattaṃ yonisomanasikārā ayaṃ puggalo āsavānaṃ khayā anāsavañcetovimuttiṃ paññāvimuttiṃ diṭṭhe va dhamme sayaṃ abhiññā sacchikatvā upasampajja viharissatīti . etadānuttariyaṃ bhante parapuggalavimuttiñāṇe.