[92] Kiñcāhaṃ bhante evaṃ puṭṭho evaṃ byākaramāno vuttavādī ceva ahaṃ bhagavato homi na ca bhagavantaṃ abhūtena abbhācikkhāmi dhammassa cānudhammaṃ byākaromi na ca koci sahadhammiko vādānuvādo gārayhaṭṭhānaṃ āgacchatīti . taggha tvaṃ sārīputta evaṃ puṭṭho evaṃ byākaramāno vuttavādī ceva me hosi na ca maṃ abhūtena abbhācikkhasi dhammassa cānudhammaṃ byākarosi na ca koci sahadhammiko vādānuvādo gārayhaṭṭhānaṃ āgacchatīti.

[93] Evaṃ vutte āyasmā udāyi bhagavantaṃ etadavoca acchariyaṃ bhante abbhutaṃ bhante tathāgatassa appicchatā santuṭṭhitā sallekhatā yatra hi nāma tathāgato evaṃmahiddhiko evaṃmahānubhāvo atha ca pana neva attānaṃ pātukarissati ekamekañcapi ito bhante dhammaṃ aññatitthiyā paribbājakā attani samanupasseyyuṃ te tāvatakeneva paṭākaṃ parihareyyuṃ acchariyaṃ bhante abbhutaṃ bhante tathāgatassa appicchatā santuṭṭhitā sallekhatā yatra hi nāma tathāgato evaṃmahiddhiko evaṃmahānubhāvo atha ca pana neva attānaṃ pātukarissatīti. {93.1} Passa kho tvaṃ udāyi tathāgatassa appicchatā santuṭṭhitā sallekhatā yatra hi nāma tathāgato evaṃmahiddhiko evaṃmahānubhāvo atha ca pana neva attānaṃ pātukarissatīti ekamekañcapi ito udāyi dhammaṃ aññatitthiyā paribbājakā attani samanupasseyyuṃ te tāvatakeneva paṭākaṃ parihareyyuṃ passa kho tvaṃ udāyi tathāgatassa appicchatā santuṭṭhitā sallekhatā yatra hi nāma tathāgato evaṃmahiddhiko evaṃmahānubhāvo atha ca pana neva attānaṃ pātukarissatīti. {93.2} Athakho bhagavā āyasmantaṃ sārīputtaṃ āmantesi yasmātiha tvaṃ sārīputta imaṃ dhammapariyāyaṃ abhikkhaṇaṃ bhāseyyāsi bhikkhūnaṃ bhikkhunīnaṃ upāsakānaṃ upāsikānaṃ yesaṃpi hi sārīputta moghapurisānaṃ bhavissati tathāgate kaṅkhā vā vimati vā tesaṃpīmaṃ dhammapariyāyaṃ sutvā tathāgate kaṅkhā vā vimati vā sā pahīyissatīti. Iti hidaṃ āyasmā Sārīputto bhagavato sammukhā sampasādaṃ pavedesi . tasmā imassa veyyākaraṇassa sampasādanīyantveva adhivacananti. Sampasādanīyasuttaṃ niṭṭhitaṃ pañcamaṃ. --------------