[100] Idha [1]- cunda satthā ca loke udapādi arahaṃ sammāsambuddho dhammo ca svākkhāto suppavedito niyyāniko upasamasaṃvattaniko sammāsambuddhappavedito aviññāpitatthā cassa honti sāvakā saddhamme nesaṃ satthu ca nesaṃ kevalaṃ paripūraṃ brahmacariyaṃ āvikataṃ hoti uttānīkataṃ sabbasaṅgāhapadakataṃ sappāṭihirakataṃ yāva devamanussehi suppakāsitaṃ atha nesaṃ satthuno antaradhānaṃ hoti . evarūpo kho cunda satthā ca sāvakānaṃ kālakato anutappo hoti . taṃ kissa hetu . Satthā hi loke udapādi arahaṃ sammāsambuddho dhammo ca svākkhāto suppavedito niyyāniko upasamasaṃvattaniko sammāsambuddhappavedito aviññāpitatthā camhā saddhamme na ca no kevalañca paripūraṃ brahmacariyaṃ āvikataṃ hoti uttānīkataṃ sabbasaṅgāhapadakataṃ sappāṭihirakataṃ yāva devamanussehi suppakāsitaṃ atha no satthuno antaradhānaṃ hoti . Evarūpo kho cunda satthā ca sāvakānaṃ kālakato anutappo hoti.

[101] Idha pana cunda satthā ca loke udapādi arahaṃ sammāsambuddho dhammo ca svākkhāto suppavedito niyyāniko upasamasaṃvattaniko sammāsambuddhappavedito viññāpitatthā cassa Honti sāvakā saddhamme kevalañca tesaṃ paripūraṃ brahmacariyaṃ āvikataṃ hoti uttānīkataṃ sabbasaṅgāhapadakataṃ sappāṭihirakataṃ yāva devamanussehi suppakāsitaṃ atha nesaṃ satthuno antaradhānaṃ hoti . Evarūpo kho cunda satthā sāvakānaṃ kālakato anānutappo hoti. Taṃ kissa hetu . satthāpi loke udapādi arahaṃ sammāsambuddho dhammo ca svākkhāto suppavedito niyyāniko upasamasaṃvattaniko sammāsambuddhappavedito viññāpitatthā camhā saddhamme kevalañca no paripūraṃ brahmacariyaṃ āvikataṃ hoti uttānīkataṃ sabbasaṅgāhapadakataṃ sappāṭihirakataṃ yāva devamanussehi suppakāsitaṃ athakho satthuno antaradhānaṃ hoti . evarūpo kho cunda satthā sāvakānaṃ kālakato anānutappo hotīti .