[105] Ahaṃ kho pana cunda etarahi satthā loke uppanno arahaṃ sammāsambuddho dhammo ca svākkhāto suppavedito niyyāniko upasamasaṃvattaniko sammāsambuddhappavedito viññāpitatthā ca me sāvakā saddhamme kevalañca tesaṃ paripūraṃ brahmacariyaṃ āvikataṃ hoti uttānīkataṃ sabbasaṅgāhapadakataṃ sappāṭihirakataṃ yāva devamanussehi suppakāsitaṃ . ahaṃ kho pana cunda etarahi satthā thero rattaññū cirapabbajito addhagato vayo anuppatto.
[106] Santi kho pana me cunda etarahi therā bhikkhū sāvakā honti viyattā vinītā visāradā pattayogakkhemā alaṃ samakkhātuṃ saddhammassa alaṃ uppannaṃ parappavādaṃ sahadhammena suniggahitaṃ niggahetvā sappāṭihāriyaṃ dhammaṃ desetuṃ . santi kho pana me Cunda etarahi majjhimā bhikkhū sāvakā . santi kho pana me cunda etarahi navā bhikkhū sāvakā . santi kho pana me cunda etarahi therā bhikkhuniyo sāvikā . santi kho pana me cunda etarahi majjhimā bhikkhuniyo sāvikā . santi kho pana me cunda etarahi navā bhikkhuniyo sāvikā . santi kho pana me cunda etarahi upāsakā sāvakā gihī odātavasanā brahmacārino . santi kho pana me cunda etarahi upāsakā sāvakā gihī odātavasanā kāmabhogino .pe. Santi kho pana me cunda etarahi upāsikā sāvikā gihinī odātavasanā kāmabhoginiyo . etarahi pana me cunda brahmacariyaṃ iddhañceva phītañca vitthārikaṃ bahujaññaṃ puthubhūtaṃ yāva devamanussehi suppakāsitaṃ.
[107] Yāvatā kho cunda etarahi satthāro loke uppannā. Nāhaṃ cunda aññaṃ ekaṃ satthāraṃpi samanupassāmi evaṃlābhagga- yasaggappattaṃ yatharivāhaṃ . yāvatā kho pana me cunda etarahi saṅgho vā gaṇo vā loke uppanno . nāhaṃ cunda aññaṃ ekaṃ saṅghaṃpi samanupassāmi evaṃlābhaggayasaggappattaṃ yathariva cunda bhikkhusaṅgho. {107.1} Yaṃ kho taṃ cunda sammā vadamāno vadeyya sabbākārasampannaṃ sabbakāraparipūraṃ anūnaṃ anadhikaṃ svākkhātaṃ kevalaparipūraṃ brahmacariyaṃ suppakāsitanti . idameva taṃ sammā vadamāno vadeyya sabbākārasampannaṃ sabbākāraparipūraṃ .pe. suppakāsitanti . uddako sudaṃ cunda rāmaputto evaṃ vācaṃ bhāsati passaṃ na passatīti . Kiñca passaṃ na passatīti . khurassa sādhunisitassa talamassa passati dhārañca khurassa na passati . idaṃ vuccati cunda passaṃ na passatīti . taṃ kho panetaṃ cunda uddakena rāmaputtena bhāsitaṃ hīnaṃ gammaṃ pothujjanikaṃ anariyaṃ anatthasañhitaṃ khurameva sandhāya. {107.2} Yañcetaṃ cunda sammā vadamāno vadeyya passaṃ na passatīti . idameva taṃ sammā vadamāno vadeyya passaṃ na passatīti . kiñca passaṃ na passatīti . evaṃ sabbākārasampannaṃ sabbākāraparipūraṃ anūnaṃ anadhikaṃ svākkhātaṃ kevalaparipūraṃ brahmacariyaṃ suppakāsitanti iti hetaṃ na passatīti idamettha apakaḍḍheyya . Evantaṃ parisuddhataraṃ assāti iti hetaṃ na passatīti idamettha upakaḍḍheyya . evantaṃ parisuddhataraṃ assāti iti hetaṃ na passati. Idaṃ vuccati passaṃ na passatīti . Yaṃ kho taṃ cunda sammā vadamāno vadeyya sabbākārasampannaṃ .pe. brahmacariyaṃ suppakāsitanti . idametaṃ sammā vadamāno vadeyya sabbākārasampannaṃ sabbākāraparipūraṃ anūnaṃ anadhikaṃ svākkhātaṃ kevalaparipūraṃ brahmacariyaṃ suppakāsitanti.