[108] Tasmātiha cunda ye te mayā dhammā abhiññā desitā tattha sabbeheva saṅgamma samāgamma atthena atthaṃ byañjanena byañjanaṃ saṅgāyitabbaṃ vicaritabbaṃ yathayidaṃ brahmacariyaṃ addhaniyaṃ assa ciraṭṭhitikaṃ tadasseva bahujanahitāya bahujanasukhāya lokānukampāya atthāya hitāya sukhāya devamanussānaṃ . katame ca te Cunda dhammā mayā abhiññā desitā . yattha sabbeheva saṅgamma samāgamma atthena atthaṃ byañjanena byañjanaṃ saṅgāyitabbaṃ vicaritabbaṃ yathayidaṃ brahmacariyaṃ addhaniyaṃ assa ciraṭṭhitikaṃ tadasseva bahujanahitāya bahujanasukhāya lokānukampāya atthāya hitāya sukhāya devamanussānaṃ . seyyathīdaṃ . cattāro satipaṭṭhānā cattāro sammappadhānā cattāro iddhipādā pañcindriyāni pañca balāni satta sambojjhaṅgā ariyo aṭṭhaṅgiko maggo. {108.1} Ime kho te cunda dhammā mayā abhiññā desitā yattha sabbeheva saṅgamma samāgamma atthena atthaṃ byañjanena byañjanaṃ saṅgāyitabbaṃ vicaritabbaṃ yathayidaṃ brahmacariyaṃ addhaniyaṃ assa ciraṭṭhitikaṃ tadasseva bahujanahitāya bahujanasukhāya lokānukampāya atthāya hitāya sukhāya devamanussānaṃ.

[109] Tesañca kho cunda samaggānaṃ sammodamānānaṃ avivadamānānaṃ sikkhitabbaṃ . aññataro sabrahmacārī saṅgho dhammaṃ bhāseyya tatra ce tumhākaṃ evamassa ayaṃ kho āvuso āyasmā atthañceva micchā gaṇhāti byañjanāni ca micchā ropetīti . tassa neva abhinanditabbaṃ nappaṭikkositabbaṃ . Anabhinanditvā appaṭikkositvā so evamassa vacanīyo imassa nu kho āvuso atthassa imāni [7]- byañjanāni etāni vā byañjanāni katamāni opāyikatarāni imesaṃ vā byañjanānaṃ ayaṃ vā attho eso vā attho katamo Opāyikataroti . so ce evaṃ vadeyya imassa kho āvuso atthassa imāneva byañjanāni opāyikatarāni yāni ceva etāni imesaṃ byañjanānaṃ ayameva attho opāyikataro yo ceva esoti . so neva ussādetabbo na apasādetabbo. Anussādetvā anapasādetvā sveva sādhukaṃ saññāpetabbo tassa ca atthassa tesañca byañjanānaṃ nisantiyā.