[114] Ṭhānaṃ kho panetaṃ cunda vijjati yaṃ aññatitthiyā paribbājakā evaṃ vadeyyuṃ sukhallikānuyogamanuyuttā samaṇā sakyaputtiyā viharantīti . evaṃ vadamānā cunda aññatitthiyā paribbājakā evamassu vacanīyā katamo so āvuso sukhallikānuyogo sukhallikānuyogāpi hi bahū anekavihitā nānappakārakāti. {114.1} Cattārome cunda sukhallikānuyogā hīnā gammā pothujjanikā anariyā anatthasañhitā na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattanti. Katame cattāro. {114.2} Idha cunda ekacco bālo pāṇe vadhitvā attānaṃ sukheti piṇeti ayaṃ paṭhamo sukhallikānuyogo . puna caparaṃ cunda Idhekacco adinnaṃ ādiyitvā attānaṃ sukheti piṇeti ayaṃ dutiyo sukhallikānuyogo . puna caparaṃ cunda idhekacco musā bhaṇitvā attānaṃ sukheti piṇeti ayaṃ tatiyo sukhallikānuyogo . puna caparaṃ cunda idhekacco pañcahi kāmaguṇehi samappito samaṅgibhūto paricāreti ayaṃ catuttho sukhallikānuyogo . ime kho cunda cattāro sukhallikānuyogā hīnā gammā pothujjanikā anariyā anatthasañhitā na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattanti.

[115] Ṭhānaṃ kho panetaṃ cunda vijjati yaṃ aññatitthiyā paribbājakā evaṃ vadeyyuṃ ime cattāro sukhallikānuyoge anuyuttā samaṇā sakyaputtiyā viharantīti . te vo mā hevantissu vacanīyā na te vo sammā vadamānā vadeyyuṃ na abbhācikkheyyuṃ te vo asatā abhūtena. {115.1} Cattārome cunda sukhallikānuyogā ekantaṃ nibbidāya virāgāya nirodhāya upasamāya abhiññāya sambodhāya nibbānāya saṃvattanti . katame cattāro . idha cunda vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja viharati ayaṃ paṭhamo sukhallikānuyogo . puna caparaṃ cunda bhikkhu vitakkavicārānaṃ vūpasamā .pe. dutiyaṃ jhānaṃ upasampajja viharati ayaṃ dutiyo sukhallikānuyogo . puna caparaṃ cunda bhikkhu pītiyā ca virāgā .pe. Tatiyaṃ jhānaṃ upasampajja viharati ayaṃ tatiyo sukhallikānuyogo . Puna caparaṃ cunda bhikkhu sukhassa ca pahānā dukkhassa ca pahānā .pe. Catutthaṃ jhānaṃ upasampajja viharati ayaṃ catuttho sukhallikānuyogo . Ime kho cunda cattāro sukhallikānuyogā ekantaṃ nibbidāya virāgāya nirodhāya upasamāya abhiññāya sambodhāya nibbānāya saṃvattanti . ṭhānaṃ kho panetaṃ cunda vijjati yaṃ aññatitthiyā paribbājakā evaṃ vadeyyuṃ ime kho cattāro sukhallikānuyoge anuyuttā samaṇā sakyaputtiyā viharantīti . te vo evantissu vacanīyā sammā te vo vadamānā vadeyyuṃ na te vo abbhācikkheyyuṃ asatā abhūtena.