[118] Ṭhānaṃ kho panetaṃ cunda vijjati yaṃ aññatitthiyā paribbājakā evaṃ vadeyyuṃ atītaṃ kho addhānaṃ ārabbha samaṇo gotamo atīrakaṃ ñāṇadassanaṃ paññapeti no ca kho anāgataṃ addhānaṃ ārabbha atīrakaṃ ñāṇadassanaṃ paññapeti tayidaṃ kiṃsu tayidaṃ kathaṃsūti . Te ca aññatitthiyā paribbājakā aññāvihitakena ñāṇadassanena aññāvihitaṃ añāṇadassanaṃ paññapetabbaṃ maññanti yathariva bālā abyattā. {118.1} Atītaṃ kho cunda addhānaṃ ārabbha tathāgatassa satānusāriñāṇaṃ hoti so yāvatakaṃ ākaṅkhati tāvatakaṃ anussarati anāgatañca kho addhānaṃ ārabbha tathāgatassa bodhijaṃ ñāṇaṃ uppajjati Ayamantimā jāti natthidāni punabbhavoti.
[119] Atītañcepi [1]- cunda hoti abhūtaṃ atacchaṃ anatthasañhitaṃ na taṃ tathāgato byākaroti . atītañcepi kho cunda hoti bhūtaṃ tacchaṃ anatthasañhitaṃ taṃpi tathāgato na byākaroti . atītañcepi kho cunda hoti bhūtaṃ tacchaṃ atthasañhitaṃ tatra kālaññū tathāgato hoti tassa pañhassa veyyākaraṇāya . anāgatañcepi cunda hoti .pe. paccuppannaṃ kho cepi cunda hoti abhūtaṃ atacchaṃ anatthasañhitaṃ na taṃ tathāgato byākaroti . paccuppannaṃ cepi cunda hoti bhūtaṃ tacchaṃ anatthasañhitaṃ taṃpi tathāgato na byākaroti . paccuppannaṃpi ce cunda hoti bhūtaṃ tacchaṃ atthasañhitaṃ tatra kālaññū tathāgato hoti tassa pañhassa veyyākaraṇāya . iti kho cunda atītānāgata- paccuppannesu dhammesu tathāgato kālavādī saccavādī bhūtavādī atthavādī dhammavādī vinayavādī tasmā tathāgatoti vuccati.
[120] Yañca kho cunda sadevakassa lokassa samārakassa sabrahmakassa sassamaṇabrāhmaṇiyā pajāya sadevamanussāya diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā sammā tathāgatena abhisambuddhaṃ tasmā tathāgatoti vuccati . yañca cunda rattiṃ tathāgato anuttaraṃ sammāsambodhiṃ abhisambujjhati yañca rattiṃ anupādisesāya nibbānadhātuyā parinibbāyati yaṃ etasmiṃ anantare Bhāsati lapati niddisati sabbantaṃ tatheva ca hoti no aññathāti tasmā tathāgatoti vuccati . yathāvādī cunda tathāgato tathākārī yathākārī tathāvādī iti yathāvādī tathākārī yathākārī tathāvādī vā tasmā tathāgatoti vuccati . yaṃ sadevake loke samārake sabrahmake sassamaṇabrāhmaṇiyā pajāya sadevamanussāya tathāgato abhibhū anabhibhūto aññadatthudaso vasavattī tasmā tathāgatoti vuccati.