[125] Tatra cunda ye te samaṇabrāhmaṇā evaṃvādino evaṃdiṭṭhino [4]- asassato attā ca loko ca. Saṅkhittaṃ. Sassato ca asassato ca attā ca loko ca . nevasassato ca nāsassato ca Attā ca loko ca . sayaṅkato attā ca loko ca . Paraṅkato attā ca loko ca . sayaṅkato ca paraṅkato ca attā ca loko ca. Asayaṅkāro ca aparaṅkāro ca adhiccasamuppanno attā ca loko ca. Sassataṃ sukhadukkhaṃ . asassataṃ sukhadukkhaṃ . sassatañca asassatañca sukhadukkhaṃ . nevasassataṃ ca nāsassataṃ ca sukhadukkhaṃ . Sayaṅkataṃ sukhadukkhaṃ . paraṅkataṃ sukhadukkhaṃ . sayañca kataṃ paraṅkatañca sukhadukkhaṃ . Asayaṅkāraṃ aparaṅkāraṃ adhiccasamuppannaṃ sukhadukkhaṃ idameva saccaṃ moghamaññanti tyāhaṃ upasaṅkamitvā evaṃ vadāmi atthi nu kho idaṃ āvuso vuccati asayaṅkāraṃ aparaṅkāraṃ adhiccasamuppannaṃ sukhadukkhanti . yañca kho te evamāhaṃsu idameva saccaṃ moghamaññanti. Tantesannānujānāmi . taṃ kissa hetu . aññathāsaññinopi hettha cunda santeke sattā . imāyapi kho ahaṃ cunda paññattiyā neva attano samasamaṃ samanupassāmi kuto bhiyyo athakho ahameva tattha bhiyyo yadidaṃ adhipaññatti . ime kho te cunda pubbantasahagatā diṭṭhinissayā ye te mayā byākatā yathā te byākātabbā yathā ca te na byākātabbā kiṃ te ahante tattha byākarissāmi.
[126] Katame te cunda aparantasahagatā diṭṭhinissayā ye te mayā byākatā yathā te byākatā yathā ca te na byākātabbā kiṃ te ahaṃ te tattha byākarissāmi . Santi cunda Eke samaṇabrāhmaṇā evaṃvādino evaṃdiṭṭhino rūpī attā hoti arogo paraṃ maraṇā idameva saccaṃ moghamaññanti . santi kho pana cunda eke samaṇabrāhmaṇā evaṃvādino evaṃdiṭṭhino arūpī attā hoti . rūpī ca arūpī ca attā hoti. Nevarūpinārūpī attā hoti . saññī attā hoti . asaññī attā hoti . Saññī ca asaññī ca attā hoti . nevasaññināsaññī attā hoti . Attā ucchijjati vinassati na hoti paraṃ maraṇā idameva saccaṃ moghamaññanti. {126.1} Tatra cunda ye te samaṇabrāhmaṇā evaṃvādino evaṃdiṭṭhino rūpī attā hoti arogo paraṃ maraṇā idameva saccaṃ moghamaññanti tyāhaṃ upasaṅkamitvā evaṃ vadāmi atthi kho idaṃ āvuso vuccati rūpī attā hoti arogo paraṃ maraṇāti yañca kho te evamāhaṃsu idameva saccaṃ moghamaññanti . tantesaṃ nānujānāmi . taṃ kissa hetu . aññathāsaññinopi hettha cunda santeke sattā . imāyapi kho ahaṃ cunda paññattiyā neva attano samasamaṃ samanupassāmi kuto bhiyyo athakho [4]- ahameva tattha bhiyyo yadidaṃ adhipaññatti.