[127] Tattha cunda ye te samaṇabrāhmaṇā evaṃvādino evaṃdiṭṭhino arūpī attā hoti . rūpī ca arūpī ca attā hoti. Nevarūpinārūpī attā hoti . saññī attā hoti . asaññī attā hoti . saññī ca asaññī ca attā hoti . Nevasaññināsaññī attā hoti . attā ucchijjati vinassati na hoti paraṃ maraṇā idameva saccaṃ moghamaññanti tyāhaṃ upasaṅkamitvā evaṃ vadāmi atthi kho idaṃ āvuso vuccati attā ucchijjati vinassati na hoti paraṃ maraṇāti . yañca kho te cunda evamāhaṃsu idameva saccaṃ moghamaññanti . tantesaṃ nānujānāmi . Taṃ kissa hetu . aññathāsaññinopi hettha cunda santeke sattā . Imāyapi kho ahaṃ cunda paññattiyā neva attano samasamaṃ samanupassāmi kuto bhiyyo athakho ahameva tattha bhiyyo yadidaṃ adhipaññatti. Ime kho cunda aparantasahagatā diṭṭhinissayā ye te mayā byākatā yathā te byākātabbā yathā ca te na byākātabbāti kiṃ te ahante tattha byākarissāmi.

[128] Imesañca cunda pubbantasahagatānaṃ diṭṭhinissayānaṃ imesañca aparantasahagatānaṃ diṭṭhinissayānaṃ pahānāya samatikkamāya evaṃ mayā cattāro satipaṭṭhānā desitā paññattā . katame cattāro . idha cunda bhikkhu kāye kāyānupassī viharati ātāpī sampajāno satimā vineyya loke abhijjhādomanassaṃ . vedanāsu . Citte . dhammesu dhammānupassī viharati ātāpī sampajāno satimā vineyya loke abhijjhādomanassaṃ . imesañca cunda pubbantasahagatānaṃ diṭṭhinissayānaṃ imesañca aparantasahagatānaṃ diṭṭhinissayānaṃ Pahānāya samatikkamāya evaṃ mayā ime cattāro satipaṭṭhānā desitā paññattāti.

[129] Tena kho pana samayena āyasmā upadāno bhagavato piṭṭhito ṭhito hoti bhagavantaṃ vījayamāno . athakho āyasmā upadāno bhagavantameva etadavoca acchariyaṃ bhante abbhutaṃ bhante pāsādiko vatāyaṃ bhante dhammapariyāyo supāsādiko vatāyaṃ bhante dhammapariyāyo ko nāmāyaṃ bhante dhammapariyāyoti . tasmātiha tvaṃ upadāna imaṃ dhammapariyāyaṃ pāsādikotveva [4]- dhārehīti. Idamavoca bhagavā . attamano āyasmā upadāno bhagavato bhāsitaṃ abhinandīti. Pāsādikasuttaṃ niṭṭhitaṃ chaṭṭhaṃ. -------------