[152] Yaṃpi bhikkhave tathāgato purimaṃ jātiṃ purimaṃ bhavaṃ purimaṃ niketaṃ pubbe manussabhūto samāno mahājanasaṅgāhakaṃ samekkhamāno samaṃ jānāti sāmaṃ jānāti purisaṃ jānāti purisavisesaṃ jānāti ayamidamarahati ayamidamarahatīti tattha tattha visesatthakaro pure ahosi . so tassa kammassa katattā .pe. so tato cuto itthattaṃ āgato samāno imāni dve mahāpurisalakkhaṇāni paṭilabhati nigrodhaparimaṇḍalo ca hoti ṭhitoyeva anonamanto ubhohi pāṇitalehi jannukāni parimasati parimajjati. {152.1} So tehi lakkhaṇehi samannāgato sace agāraṃ ajjhāvasati rājā hoti cakkavatti .pe. rājā samāno kiṃ labhati aḍḍho hoti mahaddhano mahābhogo pahūtajātarūparajato pahūtavittūpakaraṇo pahūtadhanadhañño paripuṇṇakoṭṭhāgāro rājā samāno idaṃ labhati .pe. buddho samāno kiṃ labhati aḍḍho hoti mahaddhano mahābhogo tassimāni dhanāni honti seyyathīdaṃ saddhādhanaṃ sīladhanaṃ hiridhanaṃ ottappadhanaṃ sutadhanaṃ cāgadhanaṃ paññādhanaṃ buddho samāno idaṃ labhati. Etamatthaṃ bhagavā avoca. Tatthetaṃ vuccati

[153] Tuliya pavicaya cintayitvā mahājanasaṅgāhakaṃ samekkhamāno ayamidamarahatīti tattha tattha purisavisesaṅkaro pure ahosi. Samā ca panaṭṭhito anonamanto phusati karehi ubhohi jannukāni mahiruhapparimaṇḍalo ahosi sucaritakammavipākasesakena. Bahuvividhanimittalakkhaṇaññū abhinipuṇā manujā byākariṃsu bahuvividhagihīnaṃ arahāni paṭilabhati daharo susū kumāro idha ca mahipatissa kāmabhogā gihīpatirūpakā bahū bhavanti yadi pajahati sabbakāmabhogaṃ labhati anuttaraṃ uttamaṃ dhanagganti.

[154] Yaṃpi bhikkhave tathāgato purimaṃ jātiṃ purimaṃ bhavaṃ purimaṃ niketaṃ pubbe manussabhūto samāno bahujanassa atthakāmo ahosi hitakāmo phāsukāmo yogakkhemakāmo kintīme saddhāya vaḍḍheyyuṃ sīlena vaḍḍheyyuṃ sutena vaḍḍheyyuṃ buddhiyā vaḍḍheyyuṃ cāgena vaḍḍheyyuṃ dhammena vaḍḍheyyuṃ paññāya vaḍḍheyyuṃ dhanadhaññena vaḍḍheyyuṃ khettavatthunā vaḍḍheyyuṃ dvipadacatuppadehi vaḍḍheyyuṃ puttadārehi vaḍḍheyyuṃ dāsakammakaraporisehi vaḍḍheyyuṃ ñātīhi vaḍḍheyyuṃ mittehi vaḍḍheyyuṃ bandhavehi vaḍḍheyyunti . so tassa Kammassa katattā upacitattā .pe. so tato cuto itthattaṃ āgato samāno imāni tīṇi mahāpurisalakkhaṇāni paṭilabhati sīhapubbaddhakāyo ca hoti pittantaraṃso ca samavaṭṭakkhandho ca. {154.1} So tehi lakkhaṇehi samannāgato sace agāraṃ ajjhāvasati rājā hoti cakkavatti .pe. Rājā samāno kiṃ labhati aparihānadhammo hoti na parihāyati dhanadhaññena khettavatthunā dvipadacatuppadehi puttadārehi dāsakammakaraporisehi ñātīhi mittehi bandhavehi na parihāyati sabbasampattiyā rājā samāno idaṃ labhati .pe. buddho samāno kiṃ labhati aparihānadhammo hoti na parihāyati saddhāya sīlena sutena cāgena paññāya na parihāyati sabbasampattiyā buddho samāno idaṃ labhati. Etamatthaṃ bhagavā avoca. Tatthetaṃ vuccati