[160] Yaṃpi bhikkhave tathāgato purimaṃ jātiṃ purimaṃ bhavaṃ purimaṃ niketaṃ pubbe manussabhūto samāno bahujanapubbaṅgamo ahosi kusalesu dhammesu bahujanapāmokkho kāyasucaritena vacīsucaritena manosucaritena dānasaṃvibhāge sīlasamādāne uposathūpavāse matteyyatāya petteyyatāya sāmaññatāya brahmaññatāya kulejeṭṭhāpacāyitāya aññataraññataresu ca adhikusalesu dhammesu . so tassa kammassa katattā .pe. so tato cuto itthattaṃ āgato samāno idaṃ mahāpurisalakkhaṇaṃ paṭilabhati uṇhīsasīso hoti. {160.1} So tena lakkhaṇena samannāgato sace agāraṃ ajjhāvasati rājā hoti cakkavatti .pe. rājā samāno kiṃ labhati mahāssa jano anvāyiko hoti brāhmaṇagahapatikā negamajānapadā gaṇakamahāmattā anīkaṭṭhā dovārikā amaccā pārisajjā rājāno bhogikā kumārā rājā samāno idaṃ labhati .pe. buddho samāno kiṃ labhati mahāssa jano anvāyiko hoti bhikkhū bhikkhuniyo upāsakā upāsikāyo devā manussā asurā nāgā gandhabbā buddho samāno idaṃ labhati . Etamatthaṃ bhagavā avoca. Tatthetaṃ vuccati

[161] Pubbaṅgamo sucaritesu ahu dhammesu dhammacariyābhirato anvāyiko bahujanassa ahu saggesu vedayitha puññaphalaṃ. Vedayitvā so sucaritassa phalaṃ uṇhīsasīsattamidhajjhagamā byākaṃsu byañjananimittadharā pubbaṅgamo bahujanaṃ hessati . Paṭibhogiyāni manujesu idha pubbepi tassa abhiharanti tadā yadi khattiyo bhavati bhūmipati paṭihārakaṃ bahujane labhati. Atha ceva pabbajati so manujo dhammesu hoti paguṇo visavī tassānusāsanaguṇābhirato anvāyiko bahujano bhavatīti.

[162] Yaṃpi bhikkhave tathāgato purimaṃ jātiṃ purimaṃ bhavaṃ purimaṃ niketaṃ pubbe manussabhūto samāno musāvādaṃ pahāya musāvādā paṭivirato ahosi saccavādī saccasandho theto paccayiko avisaṃvādako Lokassa . so tassa kammassa katattā .pe. so tato cuto itthattaṃ āgato samāno imāni dve mahāpurisalakkhaṇāni paṭilabhati ekekalomo ca hoti uṇṇā ca bhamukantare jātā hoti odātā mudu tūlasannibhā. {162.1} So tehi lakkhaṇehi samannāgato sace agāraṃ ajjhāvasati rājā hoti cakkavatti .pe. rājā samāno kiṃ labhati mahāssa jano upavattati brāhmaṇagahapatikā negamajānapadā gaṇakamahāmattā anīkaṭṭhā dovārikā amaccā pārisajjā rājāno bhogikā kumārā rājā samāno idaṃ labhati .pe. buddho samāno kiṃ labhati mahāssa jano upavattati bhikkhū bhikkhuniyo upāsakā upāsikāyo devā manussā asurā nāgā gandhabbā buddho samāno idaṃ labhati . Etamatthaṃ bhagavā avoca. Tatthetaṃ vuccati