[10] Evameva kho tvaṃ āvuso pāṭikaputta sugatāpadānesu jīvamāno sugatātirittāni bhuñjamāno tathāgate arahante sammāsambuddhe āsādetabbaṃ maññasi ke ca chave pāṭikaputte kā ca tathāgatānaṃ arahantānaṃ sammāsambuddhānaṃ āsādanāti . yato kho bhaggava jāliyo dārupattikantevāsī imināpi opammena neva asakkhi acelaṃ pāṭikaputtaṃ tamhā āsanā cāvetuṃ. Atha naṃ etadavoca suññaṃ anupakaminaṃ attānaṃ vighāse samekkhiya yāvattānaṃ na passati kotthu tāva byagghoti maññati Tameva so sigālakaṃ anadi ke ca chave sigāle ke pana sīhanādeti.

[11] Evameva kho tvaṃ āvuso pāṭikaputta sugatāpadānesu jīvamāno sugatātirittāni bhuñjamāno tathāgate arahante sammāsambuddhe āsādetabbaṃ maññasi ke ca chave pāṭikaputte kā ca tathāgatānaṃ arahantānaṃ sammāsambuddhānaṃ āsādanāti . yato kho bhaggava jāliyo dārupattikantevāsī imināpi opammena neva asakkhi acelaṃ pāṭikaputtaṃ tamhā āsanā cāvetuṃ. Atha naṃ etadavoca bhutvāna bheke khalamūsikāyo kaṭasīsu khittāni ca kūṇapāni mahāvane suññavane vivaḍḍho amaññi kotthu migarājāhamasmi tatheva so sigālakaṃ anadi ke ca chave sigāle ke pana sīhanādeti.

[12] Evameva kho tvaṃ āvuso pāṭikaputta sugatāpadānesu jīvamāno sugatātirittāni bhuñjamāno tathāgate arahante sammāsambuddhe āsādetabbaṃ maññasi ke ca chave pāṭikaputte kā ca tathāgatānaṃ arahantānaṃ sammāsambuddhānaṃ āsādanāti . yato kho bhaggava jāliyo dārupattikantevāsī imināpi opammena neva Asakkhi acelaṃ pāṭikaputtaṃ tamhā āsanā cāvetuṃ . atha taṃ parisaṃ āgantvā evamārocesi parābhūtarūpo bho acelo pāṭikaputto āyāmi āvuso āyāmi āvusoti vatvā tattheva saṃsappati na sakkoti āsanāpi vuṭṭhātunti. {12.1} Evaṃ vutte ahaṃ bhaggava taṃ parisaṃ etadavocaṃ abhabbo kho āvuso acelo pāṭikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ sacepissa evamassa ahantaṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti muddhāpi tassa vipateyyāti sacepāyasmantānaṃ licchavīnaṃ evamassa mayaṃ acelaṃ pāṭikaputtaṃ yāhi varattāhi bandhitvā goyuttehi āviñjeyyāmāti tā varattā chijjeruṃ pāṭikaputto vā abhabbo pana acelo pāṭikaputto taṃ vācaṃ appahāya .pe. mama sammukhībhāvaṃ āgantuṃ sacepissa evamassa ahantaṃ vācaṃ appahāya .pe. samaṇassa gotamassa sammukhībhāvaṃ gaccheyyanti muddhāpi tassa vipateyyāti. {12.2} Athakhvāhaṃ bhaggava taṃ parisaṃ dhammiyā kathāya sandassesiṃ samādapesiṃ samuttejesiṃ sampahaṃsesiṃ taṃ parisaṃ dhammiyā kathāya sandassetvā samādapetvā samuttejetvā sampahaṃsetvā mahābandhanā mokkhaṃ karitvā caturāsītipāṇasahassāni mahāviduggā uddharitvā tejodhātuṃ samāpajjitvā sattatālaṃ vehāsaṃ abbhuggantvā aññaṃ sattatālaṃpi aggiṃ abhinimminitvā jalitvā Dhūmāyitvā mahāvane kūṭāgārasālāyaṃ paccuṭṭhāsiṃ. {12.3} Athakho bhaggava sunakkhatto licchaviputto yenāhaṃ tenupasaṅkami upasaṅkamitvā maṃ abhivādetvā ekamantaṃ nisīdi . Ekamantaṃ nisinnaṃ kho ahaṃ bhaggava sunakkhattaṃ licchaviputtaṃ etadavocaṃ taṃ kiṃ maññasi sunakkhatta yatheva te ahaṃ acelaṃ pāṭikaputtaṃ ārabbha byākāsiṃ tatheva taṃ vipākaṃ no aññathāti . yatheva me bhante bhagavā acelaṃ pāṭikaputtaṃ ārabbha byākāsi tatheva taṃ vipākaṃ no aññathāti. {12.4} Taṃ kiṃ maññasi sunakkhatta yadi evaṃ sante kataṃ vā hoti uttarimanussadhammā iddhipāṭihāriyaṃ akataṃ vāti . addhā kho bhante evaṃ sante kataṃ hoti uttarimanussadhammā iddhipāṭihāriyaṃ no akatanti. Evaṃpi kho maṃ tvaṃ moghapurisa uttarimanussadhammā iddhipāṭihāriyaṃ karontaṃ evaṃ vadesi na hi pana me bhante bhagavā uttarimanussadhammā iddhipāṭihāriyaṃ karotīti . passa moghapurisa yāvañca te idaṃ aparaddhanti. Evaṃpi kho bhaggava sunakkhatto licchaviputto mayā vuccamāno apakkameva imasmā dhammavinayā yathā taṃ āpāyiko nerayiko.