[183] Cha khome gahapatiputta ādīnavā pāpamittānuyoge ye dhuttā ye soṇḍā ye pipāsā ye nekatikā ye vañcanikā ye sāhasikā tyāssa mittā honti te sahāyā . ime kho gahapatiputta cha ādīnavā pāpamittānuyoge.

[184] Cha khome gahapatiputta ādīnavā ālassānuyoge atisītanti Kammaṃ na karoti atiuṇhanti kammaṃ na karoti atisāyanti kammaṃ na karoti atipātoti kammaṃ na karoti aticchātosmīti kammaṃ na karoti atipipāsitosmīti kammaṃ na karoti tassa evaṃ kiccāpadesabahulassa viharato anuppannā ceva bhogā nuppajjanti uppannā ca bhogā parikkhayaṃ gacchanti . ime kho gahapatiputta cha ādīnavā ālassānuyogeti . idamavoca bhagavā idaṃ vatvāna sugato athāparaṃ etadavoca satthā

[185] Hoti pānasakhā nāma hoti sammiyasammiyo yo ca atthesu jātesu sahāyo hoti so sakhā. Ussūraseyyā paradārasevanā verappasaṅgo ca anatthatā ca pāpā ca mittā sukadariyatā ca ete cha ṭhānā purisaṃ dhaṃsayanti. Pāpamitto pāpasakho pāpaācāragocaro asmā lokā paramhā ca ubhayā dhaṃsate naro. Akkhitthiyo vāruṇī naccagītaṃ divāsoppaṃ pāricariyā akāle pāpā ca mittā sukadariyatā ca ete cha ṭhānā purisaṃ dhaṃsayanti. Akkhehi dibbanti suraṃ pivanti Yantitthiyo pāṇasamā paresaṃ nihīnasevī na ca vuḍḍhisevī nihīyati kāḷapakkheva candimā yo vāruṇi adhano abhicchano pipāsosi atthapāgato udakamiva iṇaṃ vigāhati ākulaṃ kāhati khippamattano. Na divāsuppasīlena rattinuṭṭhānadessinā niccaṃ mattena soṇḍena sakkā āvasituṃ gharaṃ. Atisītaṃ atiuṇhaṃ atisāyamidaṃ ahu iti vissaṭṭhakammante atthā accenti māṇave. Yo ca sītañca uṇhañca tiṇā bhiyyo na maññati karaṃ purisakiccāni so sukhā na vihāyatīti.