[186] Cattārome gahapatiputta amittā mittappaṭirūpakā veditabbā aññadatthuharo amitto mittappaṭirūpako veditabbo vacīparamo amitto mittappaṭirūpako veditabbo anuppiyabhāṇī amitto mittappaṭirūpako veditabbo apāyasahāyo amitto mittappaṭirūpako veditabbo.

[187] Catūhi kho gahapatiputta ṭhānehi aññadatthuharo amitto mittappaṭirūpako veditabbo aññadatthuharo hoti appena bahumicchati Bhayassa kiccaṃ na karoti sevati atthakāraṇā . imehi kho gahapatiputta catūhi ṭhānehi aññadatthuharo amitto mittappaṭirūpako veditabbo.

[188] Catūhi kho gahapatiputta ṭhānehi vacīparamo amitto mittappaṭirūpako veditabbo atītena paṭisantharati anāgatena paṭisantharati niratthakena saṅgaṇhāti paccuppannesu kiccesu byasanaṃ dasseti . Imehi kho gahapatiputta catūhi ṭhānehi vacīparamo amitto mittappaṭirūpako veditabbo.

[189] Catūhi kho gahapatiputta ṭhānehi anuppiyabhāṇī amitto mittappaṭirūpako veditabbo pāpakammaṃpissa anujānāti kalyāṇaṃpissa anujānāti sammukhassa vaṇṇaṃ bhāsati parammukhassa avaṇṇaṃ bhāsati . imehi kho gahapatiputta catūhi ṭhānehi anuppiyabhāṇī amitto mittappaṭirūpako veditabbo.